काठमाण्डु – वामपन्थी नेता घनेन्द्र बस्नेतको उपचारका क्रममा निधन भएको छ ।

फोक्सो र घाँटीको क्यान्सरबाट पीडित बस्नेतको बुधबार भक्तपुर क्यान्सर अस्पतालमा उपचारका क्रममा निधन भएको हो । उनको निधन भएको उनका भाञ्जा सञ्जीव रोकाहाले पुष्टि गरे ।

क्यान्सर पुष्टि भएपछि मृत्यु भएका ७१ वर्षीय बस्नेत लामो समयदेखि उपचाररत थिए । उनको भारतमा समेत उपचार गरिएको थियो । भारतबाट नेपाल ल्याएपछि उनलाई घरमै राखिएको थियो । स्वास्थ्य अवस्था जटिल भएपछि भक्तपुर क्यान्सर अस्पतालमा भर्ना गरिएको थियो ।

उपचारका लागि आर्थिक अभाव भएपछि केही समयअघि उनको सहयोगार्थ ‘घनेन्द्र बस्नेत जीवन रक्षा अभियान’ समेत सञ्चालन गरिएको थियो ।

झापा किसान विद्रोहदेखि निरन्तर वामपन्थी राजनीतिमा

बस्नेत नेपालको वामपन्थी तथा कम्युनिस्ट आन्दोलनमा लामो समयदेखि सक्रिय नेता थिए । किशोर अवस्थामै उनी झापा किसान विद्रोहमा सहभागी भएका थिए । २१ वर्षको उमेरमा पक्राउ परेका बस्नेतले राजनीतिक जीवनको महत्वपूर्ण समय जेलमै बिताएका थिए । उनी करिब १७ वर्ष जेल बसेका थिए ।

जेलबाट रिहा भएपछि पनि उनले वामपन्थी राजनीतिलाई निरन्तरता दिए । प्रौढावस्थासम्म आइपुग्दा पनि उनी राजनीतिक गतिविधिमा सक्रिय रहँदै आएका थिए ।

कम्युनिस्ट आन्दोलनमा लामो समय सक्रिय रहेका बस्नेतले विभिन्न चरणमा पार्टीका जिम्मेवारी सम्हालेका थिए । नेकपा विभाजनको समयमा उनी तत्कालीन प्रचण्ड–नेपाल समूहअन्तर्गत प्रदेश नम्बर १ को अध्यक्षको जिम्मेवारीमा समेत थिए ।

पछिल्लो समय उनी नेकपा एकीकृत समाजवादीसँग आबद्ध थिए र पार्टीका वरिष्ठ नेताका रूपमा सक्रिय थिए ।

झापा किसान विद्रोह र त्यसपछिको कम्युनिस्ट आन्दोलनमा सक्रिय रहेका बस्नेतलाई लामो समय राजनीतिक संघर्षमा बिताएका वामपन्थी नेताका रूपमा लिइन्छ । उनको निधनले नेपालको वामपन्थी आन्दोलनका एक पुराना राजनीतिक कार्यकर्ता गुमाएको छ ।