काठमाण्डु – बागमती प्रदेश सरकारले प्रदेशभित्रका प्रमुख शिवालय तथा शैव धार्मिकस्थललाई एउटै धार्मिक-पर्यटकीय परिपथमा जोड्ने गरी ‘शिव सर्किट’ परियोजना कार्यान्वयनको चरणमा अघि बढाएको छ।

प्रदेशका धार्मिक, सांस्कृतिक, ऐतिहासिक तथा परम्परागत सम्पदालाई पर्यटनसँग जोडेर पर्यटकको बसाइ अवधि लम्ब्याउने र त्यसबाट मुलुकको अर्थतन्त्रमा योगदान पुर्‍याउने उद्देश्यले परियोजनाको अवधारणा अघि सारिएको मुख्यमन्त्री किरण थापाले बताए ।

मुख्यमन्त्री थापाका अनुसार भक्तपुरसहित बागमती प्रदेशका धार्मिक तथा सांस्कृतिक रूपमा महत्वपूर्ण शिवालय र शैवस्थललाई एकीकृत पर्यटन गन्तव्यका रूपमा विकास गरिनेछ।

एउटै यात्रामार्फत विभिन्न धार्मिकस्थलको भ्रमण गर्न सकिने गरी पर्यटन मार्ग विकास गरिने र यसबाट प्रदेशका धार्मिक सम्पदाको राष्ट्रिय तथा अन्तर्राष्ट्रियस्तरमा प्रचारप्रसार हुने उनको भनाइ छ।

‘धार्मिक, सांस्कृतिक, पारम्परिक र ऐतिहासिक पर्यटकीय नगरी भक्तपुर तथा शिव सभ्यताको केन्द्रबिन्दु बागमती प्रदेशका सम्पूर्ण शिवालय तथा शैव धार्मिकस्थललाई एक परिपथ (शिव सर्किट) परियोजनामार्फत जोड्छौँ’, उनले भने, ‘हाल कायम पर्यटकहरूको बसाइ अवधि लम्ब्याउने उद्देश्यसहित कार्यक्रम सञ्चालन गर्ने अवधारणा प्रदेश सरकारले कार्यान्वयनको चरणमा पुर्‍याएको छ।’

मुख्यमन्त्री थापाले बागमती प्रदेश धार्मिक तथा सांस्कृतिक सम्पदाको क्षेत्र मात्र नभई ध्यान, योग र ज्ञानको प्राचीन भूमि भएको उल्लेख गरे । नेपालमा पुस्तौँदेखि सञ्चित ज्ञान, साधना, संस्कृति तथा ऋषिमुनिहरूको योगदानलाई विश्वसामु चिनाउनुपर्ने उनको भनाइ छ।

‘ध्यान, योग र सम्पूर्ण ज्ञानको भूमि विश्वगुरु बन्ने क्षमता, दक्षता र अपार ज्ञान तथा निधि कैयौँ विद्वान् र ऋषिमुनिहरूको पवित्र यस भूमि कोइलाभित्र लुकेर बसेको हिराजस्तो भएको छ,’ उनले भने।

नेपालको मौलिक ज्ञान, दर्शन, संस्कृति र आध्यात्मिक सम्पदालाई विश्वस्तरमा स्थापित गर्न खोजी, संरक्षण र प्रवर्द्धन गर्दै अन्तर्राष्ट्रिय समुदायसमक्ष पुर्‍याउनुपर्नेमा मुख्यमन्त्री थापाले जोड दिए।

‘अब उक्त हिरालाई कोइलाबाट बाहिर निकालेर विश्वसामु चम्काउने अभिभारा हाम्रो काँधमा आइपुगेको छ,’ उनले भने ।

प्रदेश सरकारले ‘शिव सर्किट’लाई धार्मिक पर्यटन प्रवर्द्धनसँगै स्थानीय अर्थतन्त्र, रोजगारी, होटल तथा पर्यटन व्यवसाय र सांस्कृतिक सम्पदा संरक्षणसँग जोड्ने लक्ष्य लिएको छ।

परियोजना कार्यान्वयनमा आएपछि बागमतीका धार्मिक तथा ऐतिहासिक गन्तव्यलाई एउटै पर्यटन मार्गमा जोडेर पर्यटकको बसाइ अवधि बढाउने अपेक्षा प्रदेश सरकारको छ।