काठमाण्डु– नेपाली कांग्रेसका प्रवक्ता देवराज चालिसेले पार्टीको १५औँ महाधिवेशनमा उपसभापति पदका लागि उम्मेदवारी दर्ता गराएका छन्।

मंगलबार नयाँ नेतृत्व चयनका लागि भइरहेको मनोनयन दर्ता प्रक्रियामा चालिसेले उपसभापति पदमा उम्मेदवारी दिएका हुन्।

चालिसेले यसअघि कांग्रेसको १४औँ महाधिवेशनमा सहमहामन्त्री पदमा उम्मेदवारी दिएका थिए। विशेष महाधिवेशनपछि उनले पार्टी प्रवक्ताको जिम्मेवारी सम्हाल्दै आएका छन्। विशेष महाधिवेशनको प्रक्रिया अघि बढाउने क्रममा पनि चालिसे सक्रिय थिए।

प्रवक्ताको जिम्मेवारी सम्हालिसकेपछि उपसभापति भएर पार्टीको नेतृत्व तहमा योगदान गर्ने आफ्नो चाहना रहेको चालिसेले यसअघि बताएका थिए।

कांग्रेसको १५औँ महाधिवेशनबाट एक वरिष्ठ उपसभापतिसहित चार जना उपसभापति निर्वाचित हुने व्यवस्था गरिएको छ। चालिसेको उम्मेदवारीसँगै उपसभापति पदको प्रतिस्पर्धामा थप उम्मेदवार थपिएका छन्।