काठमाण्डु- यमनको हुथी विद्रोही समूहले साउदी अरबका विमानस्थल र हवाई क्षेत्रलाई लक्षित गरी थप आक्रमण हुन सक्ने चेतावनी दिएको छ।

रियादस्थित अन्तर्राष्ट्रिय विमानस्थलमा भएको आक्रमणमा १२ जनाको मृत्यु र सयौँ घाइते भएको विवरण सार्वजनिक भएपछि हुथीले आइतबार यस्तो चेतावनी दिएको हो।

हुथी समूहले साउदी अरबका विमानस्थल प्रयोग नगर्न विमान सेवा कम्पनी, विमानस्थलका कर्मचारी र यात्रुहरूलाई आग्रह गरेको छ। यद्यपि, शनिबार भएको आक्रमणको जिम्मेवारी यो समूहले लिएको छैन।

हुथीका सैन्य प्रवक्ता याह्या सारीले सामाजिक सञ्जाल एक्समार्फत साउदी अरबका विमानस्थल र हवाई क्षेत्र आफ्नो सैन्य कारबाहीको निशानामा पर्न सक्ने बताएका छन्।

‘विमानस्थल र हवाई क्षेत्र निशानामा पर्न सक्ने अवस्थामा छन् । ती हाम्रा सेनाका लागि सैन्य कारबाहीको क्षेत्र बनेका छन्,’ सारीले लेखेका छन्।

हुथीले मक्का र मदिनाका पवित्र सहरबाहेक साउदी अरबका अन्य विमानस्थलमा यात्रा नगर्न चेतावनी दिएको छ।

समूहले साउदी अरबले आक्रमण रोक्न नसकेको भन्दै त्यसको जिम्मेवारी पनि साउदी पक्षकै हुने दाबी गरेको छ।

यमन युद्ध थप चर्किने संकेत

रियादको अन्तर्राष्ट्रिय विमानस्थलमा भएको आक्रमणलाई एक दशकभन्दा लामो अवधिमा साउदी भूमिमा भएको सबैभन्दा घातक आक्रमणका रूपमा प्रस्तुत गरिएको छ। घटनाले यमन युद्धमा थप तनाव बढ्ने संकेत देखाएको छ।

यमनमा साउदी अरबले अन्तर्राष्ट्रिय मान्यता प्राप्त सरकारलाई समर्थन गर्दै आएको छ भने हुथी विद्रोहीले देशका विभिन्न भूभागमा नियन्त्रण कायम गरेका छन्। पछिल्लो समय लालसागर तटीय क्षेत्रमा हुथीको प्रभाव विस्तार भएपछि क्षेत्रीय तनाव थप बढेको छ।

हुथीको पछिल्लो चेतावनीपछि साउदी अरबबाट हुने र साउदी अरब हुँदै अन्य गन्तव्यमा जाने उडानसमेत प्रभावित भएका छन्।

यात्रुहरूलाई यात्रा गर्नुअघि सम्बन्धित विमान सेवा कम्पनीसँग उडानको पछिल्लो अवस्थाबारे जानकारी लिन आग्रह गरिएको छ।

हुथीको चेतावनीले साउदी अरबको हवाई सुरक्षामाथि थप चिन्ता बढाएको छ। तर समूहले भविष्यमा कुन विमानस्थल वा हवाई क्षेत्रलाई लक्षित गर्नेछ भन्नेबारे विस्तृत विवरण सार्वजनिक गरेको छैन।