काठमाण्डु – अन्तरराष्ट्रिय क्रिकेट परिषद् (आईसीसी) बाट मान्यता पाएसँगै नेपाल प्रिमियर लिग (एनपीएल) मा खेलाडीको योग्यता, भ्रष्टाचार नियन्त्रण र खेल सञ्चालनसम्बन्धी नियम कडा हुने भएका छन् ।

नेपाल क्रिकेट संघ (क्यान) सचिव पारस खड्काले शनिबार कीर्तिपुरस्थित त्रिवि अन्तरराष्ट्रिय क्रिकेट मैदानमा आयोजित पत्रकार सम्मेलनमा एनपीएल सञ्चालनका लागि आईसीसीको मापदण्डअनुसार आवश्यक व्यवस्था गरिने जानकारी दिए ।

प्रतियोगितामा सहभागी विदेशी खेलाडीले सम्बन्धित क्रिकेट बोर्डबाट नो अब्जेक्सन सर्टिफिकेट (एनओसी) लिनुपर्नेछ भने म्याच फिक्सिङ र स्पट फिक्सिङ नियन्त्रण गर्न आईसीसीको भ्रष्टाचारविरोधी आचारसंहिता लागू गरिने उनले बताए ।

‘फ्रेन्चाइज क्रिकेटमा हुन सक्ने अनियमितता रोक्न आईसीसीको एन्टी–करपशन युनिट (एसीयू) का नियमहरू कडाइका साथ लागू गरिनेछ । नेपालको कानुन र आईसीसीको आचारसंहिता दुवै यसमा लागू हुने हुँदा खेलाडी, टिमधनी तथा सबै सरोकारवालाहरूले थप जिम्मेवार र सतर्क हुनुपर्नेछ,’ सचिव खड्काले भने ।

उनका अनुसार आईसीसीको प्रावधानअनुसार प्रतियोगिता सुरु हुनुभन्दा अघिल्लो ६ महिनाको अवधिमा गैरकानुनी वा सम्बन्धित निकायबाट स्वीकृति नलिएको क्रिकेट प्रतियोगिता खेलेका खेलाडी एनपीएलमा सहभागी हुन पाउने छैनन् । अन्तरराष्ट्रिय क्रिकेटबाट सन्न्यास लिइसकेका विदेशी खेलाडीले समेत सम्बन्धित क्रिकेट बोर्डबाट एनओसी लिनुपर्ने व्यवस्था छ ।

‘अन्तरराष्ट्रिय क्रिकेटबाट सन्न्यास लिएका विदेशी खेलाडीले एनपीएल खेल्नका लागि आ–आफ्नो देशको क्रिकेट बोर्डबाट अनिवार्य रूपमा एनओसी लिनुपर्नेछ । आईसीसी वा सम्बन्धित क्रिकेट बोर्डबाट स्वीकृति नलिएका प्रतियोगिताहरू एनपीएल सुरु हुनुभन्दा अघिल्लो छ महिनाको अवधिमा खेलेका खेलाडीहरू यसपटकको एनपीएलमा खेल्न योग्य हुने छैनन्,’ सचिव खड्काले भने ।

प्रतियोगिताको तेस्रो संस्करण सकिएलगत्तै ६० दिनभित्र हामीले यसको समीक्षा प्रतिवेदन बुझाउनुपर्नेछ । विदेशी खेलाडीसम्बन्धी नियम: यसपटक प्रत्येक फ्रेन्चाइज टीमले कम्तीमा ६ देखि बढीमा ८ जनासम्म विदेशी खेलाडी राख्न पाउनेछन् । खेलमा सहभागी हुने अन्तिम ११ खेलाडीमा ७ नेपाली र ४ विदेशी खेलाडी अनिवार्य समावेश गर्नुपर्नेछ ।

एनपीएलमा निर्णय पुनरावलोकन प्रणाली (डीआरएस) लागू गर्ने विषयमा तयारी अन्तिम चरणमा पुगेको सचिव खड्काले जानकारी दिए । यसबारे केही दिनभित्र औपचारिक निर्णय सार्वजनिक गरिने उनले जानकारी दिए ।

‘एनपीएलमा डीआरएस लागू गर्ने विषयमा छलफल भइरहेको छ । यसबारेमा सोमबारसम्ममा औपचारिक जानकारी दिइनेछ,’ सचिव खड्काले भने । क्यानले आगामी १९ देखि २१ नोभेम्बरसम्म काठमाण्डुमा आईसीसी एसिया सम्मेलन आयोजना गर्ने भएको छ । सम्मेलनमा एसियाका टेस्ट तथा एसोसिएट राष्ट्रका क्रिकेट संघका अध्यक्ष, सचिव र प्रमुख कार्यकारी अधिकृत सहभागी हुने सचिव खड्काले जानकारी दिए । उनका अनुसार सम्मेलनमा एसियाली क्रिकेटको नीतिगत विकासका विषयमा छलफल हुनेछ ।