सेन्ट पिटर्सबर्ग – रुसले युक्रेन र अमेरिकासँग त्रिपक्षीय वार्ता पुन: सुरु गर्न सैद्धान्तिक सहमति जनाएको छ ।

तर अमेरिकी राजदूत स्टिभ विटकफले राष्ट्रपति भ्लादिमिर पुटिनसमक्ष प्रस्तुत गरेको युक्रेन र युरोपको शान्ति प्रस्तावमा पर्याप्त सार नभएको भन्दै मस्कोले युद्ध अन्त्यको सम्भावनाप्रति आशंका व्यक्त गरेको छ ।

अमेरिकी राष्ट्रपति डोनाल्ड ट्रम्पले युद्ध अन्त्य गर्न आफूहरू अहिलेसम्मकै नजिक पुगेको बताएका छन् । पुटिनसँग ३ घण्टा वार्ता गरेका विटकफले छलफल रचनात्मक भए पनि महत्वपूर्ण काम बाँकी रहेको बताए । क्रेमलिनका सहयोगी युरी उशाकोभका अनुसार रुस नोभेम्बरको मध्यतिर वार्ता पुन: सुरु गर्न तयार छ र युद्धपछिको सुरक्षा व्यवस्थालाई प्राथमिकता दिन चाहन्छ ।

यसैबिच युक्रेनमा रुसी आक्रमण जारी छ । राजधानी किएभमा २ जनासहित कम्तीमा ४ जनाको मृत्यु भएको युक्रेनी अधिकारीहरूले बताएका छन् । पूर्वी खार्किभ क्षेत्रमा १ वृद्ध दम्पतीको पनि मृत्यु भएको छ । यता रुसी कब्जामा रहेको लुगान्स्क क्षेत्रमा युक्रेनी ड्रोन आक्रमणमा २ जनाको मृत्यु भएको रुसी अधिकारीहरूले दाबी गरेका छन् ।

युक्रेनी राष्ट्रपति भोलोदिमर जेलेन्स्कीले पनि त्रिपक्षीय वार्ता पुन: सुरु गर्ने प्रस्तावलाई समर्थन गरेका छन् । ओस्लोमा विटकफसँग भएको भेटमा अमेरिका र युक्रेनबिचको मतभेद कम गर्ने प्रयास गरिएको थियो । वार्तामा ट्रम्पका ज्वाइँ जारेड कुसनरले पनि टाढाबाट सहभागिता जनाएका थिए ।

यसअघि ट्रम्पले सन् २०२५ जनवरीमा युद्ध २४ घण्टाभित्र अन्त्य गर्ने वाचा गरेका थिए । तर अमेरिकी नेतृत्वमा भएका वार्ताले ठोस सफलता हासिल गर्न सकेका छैनन् । रुसले डिजेल बिक्रीसम्बन्धी सम्झौता गरेको भन्दै ट्रम्पले प्रतिबन्ध लगाउने निर्णय पछि सारेका छन् । युक्रेनका लागि भाडाका सैनिकका रूपमा लडेको आरोपमा सन् २०२२ देखि रुसी हिरासतमा रहेका अमेरिकी नागरिक तथा अवकासप्राप्त शिक्षक स्टिफन हबार्डको रिहाइ सुनिश्चित गर्न रुसमाथि प्रतिबन्ध लगाउने निर्णय रोक्नुपरेको राष्ट्रपति डोनाल्ड ट्रम्पले बताए । सम्झौताले अमेरिकी इन्धनको मूल्य घटाउन सहयोग गर्ने अपेक्षा गरिएको छ ।

यसैबिच पुटिनले हिरासतमा रहेका अमेरिकी नागरिक स्टिफन हबार्डलाई रिहा गर्न सहमति जनाएका छन् । अमेरिकी दूत विटकफले त्यसका लागि पुटिनको प्रशंसा गरे । क्रेमलिनका अनुसार आगामी महिना चीनको सेन्जेनमा रुस, अमेरिका र चीनका राष्ट्रपतिबिच शिखर बैठक गर्ने तयारीसमेत भइरहेको छ ।