काठमाण्डु- फ्रान्सको राजधानी पेरिसमा यस सप्ताहन्त हुन लागेको व्यापक प्रदर्शनका कारण पेरिस सेन्ट जर्मेन (पीएसजी) र लियोनबीचको फ्रेन्च लिग वान फुटबल खेल सोमबारका लागि सारिएको छ।

फ्रेन्च प्रोफेसनल फुटबल लिग (एलएफपी) का अनुसार, प्रहरी प्रशासनको अनुरोधमा आइतबारका लागि निर्धारित खेल सारिएको हो। खेल स्थानीय समयअनुसार सोमबार राति ८ : ३० बजे पेरिसस्थित पार्क डेस प्रिन्सेस रंगशालामा हुनेछ।

यसअघि खेल आइतबार राति ८ : ४५ बजे हुने तालिका थियो। तर, पेरिसमा यस सप्ताहन्त व्यापक प्रदर्शनको तयारी भइरहेका बेला सुरक्षा व्यवस्थापनका लागि पर्याप्त प्रहरी परिचालन गर्नुपर्ने भएकाले खेल सार्ने निर्णय गरिएको हो।

एलएफपीले आइतबार पीएसजी र ओलम्पिक लियोनबीचको खेल सञ्चालनमा रोक लगाउने प्रहरी प्रशासनको आदेशलाई स्वीकार गरेको जनाएको छ।

महँगी र सार्वजनिक सेवाविरुद्ध प्रदर्शन

फ्रान्समा गत साता भएको प्रदर्शनका क्रममा देशभरका नगर भवन, सार्वजनिक संरचना र हजारौँ व्यवसाय प्रभावित भएका थिए। प्रहरी र प्रदर्शनकारीबीच झडप हुँदा विभिन्न स्थानमा हिंसा फैलिएको थियो। पसलहरू तोडफोड तथा आगजनीमा परेका थिए।

गत शनिबार फ्रान्सभर भएका ११० वटा प्रदर्शन र्‍यालीमा करिब ५ लाख ५० हजार मानिस सहभागी भएको समाचारमा उल्लेख छ। प्रदर्शनकारीहरूले बढ्दो जीवनयापन खर्च र विद्यालयहरूको कमजोर अवस्थाप्रति असन्तुष्टि जनाएका थिए।

शीर्ष स्थानको प्रतिस्पर्धा

डिफेन्डिङ च्याम्पियन पीएसजी र लियोन लिग वानको आठौँ चरणका खेलअघि समान १४ अंकसहित तालिकाको शीर्ष स्थानमा थिए। खेल सोमबार सारिएपछि दुवै टोलीको शीर्ष स्थानको प्रतिस्पर्धा थप चासोको विषय बनेको छ।

पीएसजीका ओस्मान डेम्बेले, अचरफ हाकिमी, ख्विचा क्वारात्स्खेलिया, मार्किन्होस, नुनो मेन्डेस, जोआओ नेभेस, विलियन पाचो, फाबियान रुइज, फेरान टोरेस र भिटिन्हा यस वर्षको बालोन डीुओर समारोहका लागि मनोनयनमा परेका छन्।

पेरिसमा पहिलोपटक एनएफएल खेल

यसैबीच, आइतबार पेरिसमा पहिलोपटक नेसनल फुटबल लिग (एनएफएल) अन्तर्गत अमेरिकी फुटबल खेल हुँदैछ। स्टाड डे फ्रान्स रंगशालामा पिट्सबर्ग स्टिलर्स र न्यु अर्लिन्स सेन्ट्सबीच प्रतिस्पर्धा हुनेछ।

उक्त खेल हेर्न करिब ८० हजार दर्शक उपस्थित हुने अपेक्षा छ। ठूलो संख्यामा दर्शक उपस्थित हुने खेल र व्यापक प्रदर्शन एकै समयमा हुन लागेकाले फ्रान्सेली राजधानीको सुरक्षा व्यवस्थापनमा प्रहरीमाथि थप दबाब परेको छ।