काठमाण्डु – ब्राजिलका राष्ट्रपति लुइज इनासियो लुला दा सिल्भा पुनः निर्वाचित भएका छन्।

आइतबार भएको दोस्रो चरणको चुनावमा सिनेटर फ्लाभियो बोल्सोनारोलाई पराजित गर्दै लुलाले चौथो पटक राष्ट्रपति बनेका हुन् । उनको जितले ल्याटिन अमेरिकामा अमेरिकी राष्ट्रपति डोनाल्ड ट्रम्पनिकट दक्षिणपन्थी राजनीतिक शक्तिको विस्तारलाई चुनौती दिएको छ।

ब्राजिलको निर्वाचन अदालतका अनुसार सबै मत गणना हुँदा लुलाले कुल मतको ५१.८ प्रतिशत पाएका छन्। उनले फ्लाभियोलाई करिब ४४ लाख मतले पछि पारेका हुन्। यसअघि पहिलो चरणमा फ्लाभियोले लुलालाई २२ लाखभन्दा बढी मतले पछि पारेका थिए। पहिलो चरणमा पछि परे पनि दोस्रो चरणमा लुलाले पुनरागमन गरेका हुन्।

उनको नयाँ कार्यकाल सन् २०२७ जनवरी ५ बाट सुरु हुनेछ। लुलाको जितपछि उनका समर्थकले साओ पाउलो र रियो दि जेनेरियोलगायत सहरमा खुसी मनाएका छन्।

लुलाको जितले ल्याटिन अमेरिकाका दुई ठुला जनसंख्या भएका देश ब्राजिल र मेक्सिकोमा वामपन्थी झुकावका नेतृत्व कायम राखेको छ। ट्रम्प प्रशासनले ब्राजिलका सामानमा बढाएको भन्सार शुल्कका बिच यो नतिजाले ब्राजिललाई अमेरिकी प्रभावबाट तुलनात्मक रूपमा स्वतन्त्र नीति अपनाउने अवसर दिएको विश्लेषण गरिएको छ।

लुलाको राजनीतिक यात्रा सन् १९७० को दशकमा मजदुर युनियन नेताका रूपमा सुरु भएको थियो। उनी पहिलो पटक सन् २००३ मा राष्ट्रपति बनेका थिए। भ्रष्टाचारसम्बन्धी मुद्दामा जेल परे पनि उनको सजाय पछि रद्द भएको थियो।

त्यसपछि सन् २०२२ मा जैर बोल्सोनारोलाई हराउँदै उनी फेरि सत्तामा फर्किएका थिए। अहिलेको जितसँगै लुलाले ब्राजिलको राजनीतिमा आफ्नो प्रभाव थप बलियो बनाएका छन्।