काठमाण्डु- नेपाल प्रिमियर लिग (एनपीएल)मा शुक्रबार दुई खेल हुँदैछन्। कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट मैदानमा हुने पहिलो खेलमा सुदूरपश्चिम रोयल्स र कर्णाली याक्सबीच प्रतिस्पर्धा हुनेछ।

दिउँसो १२ः३० बजे सुरु हुने खेलमा दुवै टोली जितको लक्ष्यसहित मैदान उत्रनेछन्। चार खेल खेलेको सुदूरपश्चिमले दुई जित र दुई हार बेहोरेको छ। पाँचौँ खेल खेल्न लागेको सुदूरपश्चिमलाई प्लेअफ यात्रालाई बलियो बनाउन आजको खेल जित्नुपर्ने दबाब छ।

यस्तै तीन खेल खेलेको कर्णाली याक्सले एक जित र दुई हार बेहोर्दै चार अंक जोडेको छ। चौथो खेल खेल्न लागेको कर्णाली पनि जित निकाल्दै अंक तालिकामा आफ्नो स्थिति सुधार गर्ने योजनामा हुनेछ।

यसैगरी साँझ ५ बजे हुने दोस्रो खेलमा चितवन राइनोज र पोखरा एभेन्जर्स आमनेसामने हुनेछन्। तीन खेल खेलेको चितवनले एक जित, एक हार र एक खेलमा अंक बाँडेको छ। तीन अंकसहित तालिकाको पुछारबाट तेस्रो स्थानमा रहेको चितवनलाई पनि आजको खेल महत्त्वपूर्ण छ। जित निकाल्दै टोली अंक तालिकामा आफ्नो स्थान सुधार गर्न चाहन्छ।

अर्कोतर्फ पोखरा एभेन्जर्स भने प्रतियोगितामा पहिलो जितको खोजीमा छ। यसअघि खेलेका खेलमा अपेक्षित नतिजा निकाल्न नसकेको पोखरा आज चितवनलाई हराउँदै जितको खाता खोल्ने लक्ष्यमा हुनेछ। दुवै खेलले अंक तालिकाको समीकरणमा प्रभाव पार्ने भएकाले टोलीहरूका लागि जित महत्त्वपूर्ण हुनेछ।