म्याग्दी – बेनीमा आईतबार सम्पन्न २ लाखभन्दा बढी पुरस्कार राशिको चौथो बौद्ध कप खुला फूटबल प्रतियोगिताको उपाधि एभरग्रिन युवा क्लबले जितेको छ ।

बेनी नगरपालिका–७ मंगलाघाटमा रहेको बौद्ध युवा क्लबले आयोजना गरेको प्रतियोगिताको फाइनलमा मालिका गाउँपालिका–६ दुखुको मितेरी युवा क्लबलाई शून्यविरुद्ध ३ गोल गर्दै एभरग्रिन बिजयी भएको हो ।

मनसुन युवा क्लबलाई शून्यका विरुद्ध ३ गोल गर्दै मालिका गाउँपालिका–६ दरवाङको पश्चिम म्याग्दी युवा क्लब तेस्रो भएको आयोजक वौद्ध युवा क्लबका सचिव श्यामशुन्दर कँडेलले जानकारी दिए । ५ दिनसम्म सञ्चालन भएको प्रतियोगितामा विजेताले ट्रफी, मेडल र प्रमाणपत्रसहित नगद २ लाख २२ हजार २२२, उपविजेताले १ लाख ११ हजार १११ र तेस्रोले ५५ हजार ५५५ नगद पुरस्कार प्राप्त गरेका छन् ।

अनुशासित घोषणा भएको बरबुटा युवा क्लब खबराले २२ हजार २२२ प्राप्त गरेको छ । एभरग्रिनका रोशन छन्त्यालले ७ हजार ७७७ नगदसहित उत्कृष्ट खेलाडीको उपाधि पाएका छन् । 

उत्कृष्ट डिफेन्डर मतेरीका सन्दिप गुरुङ र ९ गोल गरेका पश्चिम म्याग्दीका विपुल कार्की सर्वाधिक गोलकर्ताको उपाधिसहित नगद ७ हजार ७७७ नगद पुरस्कार प्राप्त गरेका छन् । गोलरक्षकमा एभरग्रिनका आसिस केसी, फरवार्डमा अमृत तामाङ र मिडफिल्डरमा निराजन खत्री उत्कृष्ट भए । उनीहरूले मेडल, ट्रफी र प्रमाणपत्रसहित नगद ७ हजार ७७७ का दरले पुरस्कार प्राप्त गरेका छन् ।

गण्डकी प्रदेशसभा सदस्य हरिबहादुर भण्डारी, क्लबका अध्यक्ष दुर्गा बुढामगर, म्याग्दी उद्योग वाणिज्य संघका अध्यक्ष सुविन श्रेष्ठ लगायतले पुरस्कार वितरण गरेका थिए । दसैँतिहार पर्वको अवसरमा कात्तिक १८ गतेदेखि सुरु भएको प्रतियोगितामा १८ टिम सहभागी भएका थिए । 

प्रतियोगिता अवलोकनका लागि प्रतिव्यक्ति ५० रुपैयाँका दरले संकलन गरिएको प्रवेश शुल्कबाट ४० प्रतिशत असोजको दोस्रो हप्ता आएको बाढीपहिरोबाट प्रभावितलाई राहत स्वरूप हस्तान्तरण गरिने क्लबका अध्यक्ष बुढामगरले जानकारी बताए । उनका अनुसार प्रतियोगिता सञ्चालनबाट बचत भएको रकम क्लबको कार्यालय भवन निर्माण तथा कोष स्थापनामा खर्च गर्ने लक्ष्य रहेको छ ।