काठमाडौं – नेपाली सेनाले खरिद गरेको कार्गो जहाज शनिबार काठमाडौं आउँदैछ ।

नेपाली सेनाले २०१७ मा खरिद सम्झौता गरेर इन्डोनेसियामा निर्माण गरिएको सैन्य ट्रान्सपोर्ट एयरक्राफ्ट सीएन २३५–२२० विमान नेपाली सेनालाई बुधबार हस्तान्तरण गरिएको हो ।

बुधबार नै उक्त जहाज नेपालका लागि उडेको र शनिबार दिउँसोसम्म काठमाडौंमा अवतरण गर्ने जानकारी नेपाली सेनाका प्रवक्ता सहायकरथी विज्ञानदेव पाण्डे बताए ।

सैनिक प्रवक्ता पाण्डेका अनुसार उक्त विमान इन्डोनेसियाको सरकारी कम्पनी पीटी डिरागान्ताराले बनाएको हो । उक्त जहाजको मूल्य करिब साढे तीन अर्बको हाराहारीमा रहेको छ । विमान निर्माणका लागि सन् २०१७ जुनमा नेपाली सेनाले ३० मिलियन अमेरिकी डलरको सम्झौतापत्रमा हस्ताक्षर गरेको थियो ।

सैनिक प्रवक्ता सहायक रथी पाण्डेले यो जहाज सबै प्रयोजनका लागि उपयोगी हुने बताए । खासगरी विपद्‍का बेलका आपतकालीन उद्धार र राहतका क्रममा यो जहाज प्रयोग हुनेछ । यसले आपतकालीन उद्धार र राहतको कामलाई सहज र प्रभावकारी बनाउने प्रवक्ता पाण्डे बताए ।

सेनासँग जहाज र हेलिकोप्टर गरी २२ वटा हवाइ साधन रहेकोमा अहिले १० वटा संचालनमा छन् भने १२ वटा ग्राउन्डेड छन् ।