सुर्खेत – सुर्खेत विमानस्थल थप २ दिन बन्द गरिएको छ । विमानस्थलको धावनमार्ग (रनवे) मा खाल्डो परेपछि बन्द गरेर निर्माण थालिएको थियो ।

पहिले खाल्डो परेको ठाउँमा मर्मतको काम सकिएपछि अर्को ठाउँमा पनि जमिनमुनिबाट पानी निस्किएपछि थप २ दिन बन्द गरी काम थालिएको विमानस्थल प्रमुख हिराजन काफ्लेले जानकारी दिए ।

बिहीबारदेखि विमानस्थल सुचारु गर्ने योजना भए पनि अर्को ठाउँको समस्याले फेरि २ दिनका लागि विमानस्थल बन्द गरिएको काफ्लेले बताए । ‘पहिले भ्वाङ (खाल्डो) परेको ठाउँको मर्मत सकिए पनि नजिकै १० मिटरको दूरीमा पुनः अर्को ठाउँमा जमुनीमुनिबाट पानी निस्किएको छ,’ काफ्लेले भने, ‘२ दिनमा काम सकेर विमानस्थल सञ्चालन सञ्चालनमा ल्याउने प्रयासमा छौं । खाल्डो परेको रनवे क्षेत्र यसअघि बस्ती उठाएर विस्तार गरिएको क्षेत्र छ ।’

नेवार स्कूल तर्फको उत्तरी क्षेत्रको रनवेमा खाल्डो परेपछि मंगलबारदेखि विमानस्थल बन्द गरेर काम थालिएको थियो ।

शनिवारदेखि नियमित उडान र अवतरण गराउने गरी निर्माणको काम भइरहेको विमानस्थलले जानकारी दिएको छ । सुर्खेत विमानस्थलबाट बुद्ध र श्री एयरलायन्सले दैनिक ४ उडान सुर्खेत–काठमाण्डु–सुर्खेत रुटमा उडान भर्दै आएका छन् ।