अन्तरप्रदेश भेटघाट सुरु : प्रदेश ७ का मुख्यमन्त्रीले पठाए दूत


सुर्खेत – कर्णाली वारीपारी रहेका प्रदेश नं ६ र ७ ले सहकार्यका लागि छलफल थालेका छन् । प्रदेश ७ का आर्थिक मामिला तथा योजना मन्त्री झपट बोहोराले सुर्खेत आएर प्रदेश ६ का मुख्यमन्त्री महेन्द्रबहादुर शाहीलाई भेटेका हुन् । बोहोरा प्रदेश ७ का मुख्यमन्त्री त्रिलोचन भट्टको दूतका रुपमा सुर्खेत आएका थिए । भट्टले दुई प्रदेशबीच समन्वय गर्ने र अन्तरप्रादेशिक सम्बन्ध विस्तार गर्ने सन्देशसहित दूत पठाएका हुन् ।

कर्णाली नदीको वारीपारी रहेका दुई छिमेकी प्रदेशमा करको दायरमा फरक पर्दा जनतामा विवाद हुने भएकोले त्यसलाई एकरुपमा ल्याउने विषयमा कुराकानी भएको प्रदेश ७ का आर्थिक मामिला तथा योजना मन्त्री बोहोराले जानकारी दिए । ‘दुई छिमेकी प्रदेश उस्तैउस्तै छन्, सम्भावना र चुनौती पनि उस्तै हो, मन्त्री बोहोराले भने,’कर्णाली नदी दुबै प्रदेशमा छ, प्रदेशस्तरबाटै विद्युत निकाल्न सम्भव छैन्, यस्ता विषयमा साझा धारणा बनाएर केन्द्र सरकारसंग पहल गर्ने विषयमा छलफल भयो ।’

भेटमा मुख्यमन्त्री शाहीले प्रदेश ६ मा पहाडी जिल्लामात्रै रहेको र भारतसंग जोड्ने अन्र्तराष्ट्रिय सीमा नाका नभएकाले दुई प्रदेशवीच समन्वय गरेर अघि बढ्नुपर्ने धारणा राखेका छन् । दक्षिणमा अन्र्तराष्ट्रिय सीमा नभएकोले उत्तरी नाका खोलेर व्यापार सम्झौता गर्ने योजना बनाइएको मुख्यमन्त्री शाहीले बताएका छन् । भेटमा दुई प्रदेशको समृद्धि, प्रदेश सरकारले निमार्ण गर्ने ऐन, नियम र कानून र करको दायरामा एकरुपता ल्याउने विषयमा सकरात्मक छलफल भएको छ ।

प्रतिक्रिया दिनुहोस
Advertisement