काठमाण्डु– परराष्ट्रमन्त्री डा.आरजु राणा देउवाले भारत भ्रमणका क्रममा भारतीय प्रधानमन्त्री नरेन्द्र मोदीसँग भेट गर्ने समय तय भएको छ । आइतबार भारत भ्रमणमा गएकी परराष्ट्रमन्त्री देउवाले मोदीलाई भेट्ने तय भएको हो ।
भारतीय विदेशमन्त्री एस जयशंकरको निमन्त्रणामा परराष्ट्रमन्त्री देउवाले भदौ ६ गतेसम्म भारतको औपचारिक भ्रमणमा गएकी हुन् ।
भ्रमणका क्रममा मोदीसँग ३ गते सोमबार साँझ ७:३० बजे भेट गर्ने तय भएको परराष्ट्रमन्त्री निकट स्राेतले बतायाे । भ्रमणका क्रममा परराष्ट्रमन्त्री देउवाले भारतीय समकक्षी जयशंकरसँग सोमबार भेटवार्ता गर्ने कार्यक्रम भने यसअघि नै तय भइसकेको थियो ।
मन्त्रालयले भेटवार्तामा नेपाल भारत सम्बन्धलाई थप सुमधुर बनाउन, सहयोग अभिवृद्धि गर्न र पारस्पारिक हितका विषयमा छलफल हुनेछ ।
मन्त्री राणाको भ्रमणको पूर्वसन्ध्यामा विज्ञप्ती जारी गर्दै भारतको विदेश मन्त्रालयले नेपाललाई आफ्नो प्राथमिकतामा परेको मित्रको रुपमा परिभाषित गरेको थियो ।
विज्ञप्तीमा भारतको छिमेक नीतिमा नेपाल प्राथमिकतामा परेको मित्र भएको उल्लेख छ । ‘भारतको छिमेक पहिलो नीति अन्तर्गत नेपाल प्राथमिक साझेदार हो‘ विज्ञप्तीमा भनिएको छ,‘परराष्ट्रमन्त्री राणाको आसन्न भ्रमणले द्विपक्षीय सहयोगमा भएका प्रगतिबार छलफल र समीक्षा गर्ने अवसर प्रदान गर्नेछ। यसबाट मुलुकबीचको सम्बन्धलाई अझ अगाडि बढाउन मद्दत पुग्नेछ ।’
प्रतिक्रिया