काठमाण्डु– उत्तर छिमेकी चीनले बुधबार बिनासकारी बाढी आएको ल्हेन्दे खोलाकोे माथिल्लो क्षेत्रमा ठूलो परिमाणमा पानी जमेका कारण भोटेकोशी नदीमा पुनः बाढी आउन सक्ने चेतावनी दिएको छ ।

त्यहाँको जलश्रोत मन्त्रालयले ल्हेन्दे खोलाको माथिल्लो भागमा हिमपहिरोपछि ठूलो ताल बनेको जनाएको छ ।

चीनको छोचेन खोला र नेपालको पुरेपु त्याङ्कपो खोलाको दोभानमा हिमपहिरो खसेर पानी थुनिएपछि ठूलो ताल बनेको जनाएको हो । उक्त तालबाट पानी बाहिर आउन सुरु भएको चिनियाँ सञ्चार माध्यम ग्लोबल टाइम्सले जनाएको छ ।

चिनियाँ अधिकारीहरुलाई उद्धृत गर्दै ग्लोबल टाइम्सले तालमा करिब २० लाख घनमिटर पानी जम्मा भइसकेको लेखेको छ । समाचारमा जनाइएअनुसार तालमा हिमपहिरो खसेर पानी जम्मा हुने क्रम पनि जारी छ ।

बुधबार बिहान सोही स्थानबाट आएको बाढीले नेपालको रसुवा, नुवाकोट र धादिङसहित तटीय क्षेत्रमा ठूलो जनधनको क्षति भएको छ ।