काठमाण्डु – नेपालका पर्यटन पेशाकर्मीहरूका लागि चिनियाँ भाषा प्रशिक्षण सुरु भएको छ ।

नेपाल पर्यटन बोर्ड र नेपालस्थित चिनियाँ दूतावासको संयुक्त आयोजनामा बोर्डको सभाहलमा शुक्रबार संस्कृति, पर्यटन तथा नागरिक उड्डयनमन्त्री बद्री प्रसाद पाण्डेले चिनियाँ भाषा प्रशिक्षणको सातौं व्याचको औपचारिक उद्घाटन गरेका हुन् ।

नेपालका पर्यटन पेशाकर्मी तथा व्यवसायीहरूलाई लक्षित गर्दै सुरु गरिएको भाषा प्रशिक्षण कार्यक्रमको उद्घाटन गर्दै मन्त्री पाण्डेले चिनियाँ भाषाको प्रशिक्षण कार्यक्रमले नेपालको पर्यटन प्रबद्र्धनमा टेवा पुग्ने विश्वास व्यक्त गरेका छन् ।

उनले भने, ‘चिनियाँ भाषाको ज्ञानले नेपाल चीन सम्बन्धमा सेतुको काम गर्नेछ र यसले पर्यटन प्रबद्र्धनमा टेवा पुग्ने विश्वास लिएको छु ।’

मन्त्री पाण्डेले भाषिक ज्ञान हुनु भनेको सम्पत्ति थप्नुजस्तै भएको उल्लेख गर्दै जति धेरै भाषिक ज्ञान हासिल गर्न सकियो त्यति नै योग्यता अभिवृद्धि भएको ठान्नुपर्ने बताए ।

चिनियाँ भाषाको अनुवादक हुनु भनेको सीपयुक्त जनशक्ति निर्माण हुनु पनि भएको उल्लेख गर्दै चिनियाँ भाषाको प्रशिक्षण लिनेहरू सांस्कृतिक दूतको रूपमा काम गर्न सक्ने बताए ।

मन्त्री पाण्डेले कार्यक्रममा सहभागी चिनियाँहरूलाई नेपालको प्रकृति हेर्नका लागि आह्वान गर्न समेत आग्रह गरेका छन् ।

जलवायु परिवर्तनका कारण नेपालका हिमालहरूमा हिउँ कम देखिने गरेको उल्लेख गर्दै जलवायु परिवर्तन न्यूनीकरण र अनुकुलनका कामहरू पनि भइरहेको मन्त्री पाण्डेले बताए ।

कार्यक्रमलाई सम्बोधन गर्दै नेपालका लागि चिनियाँ राजदूत छेन सोङले नेपाल र चीनबीच कूटनीतिक सम्बन्ध स्थापनाको ७५औं वर्षगाँठका अवसरमा सातौं भाषा प्रशिक्षण कार्यक्रम आयोजना गरिएको बताएका छन् ।

चिनियाँ भाषाको ज्ञान हुनु भनेको विश्वको सबैभन्दा ठूलो पर्यटन बजारको लाभ हासिल गर्ने सुवर्ण अवसर भएको समेत राजदूत सोङले बताए ।

नेपालमा चिनियाँ भाषा प्रशिक्षणको विगतका ६ वटा व्याचबाट २४० जना प्रशिक्षित भइसकेका छन् । प्रधानमन्त्री केपी शर्मा ओलीको चीन भ्रमणका क्रममा नेपाल चीनबीचको सम्बन्ध बलियो बनाउन नेपालका पर्यटन पेशाकर्मीहरूलाई चिनियाँ भाषा प्रशिक्षण गराउने सहमति भए अनुरूप सन् २०१६ देखि नेपालमा चिनियाँ भाषा प्रशिक्षण कार्यक्रम सञ्चालन भइरहेको छ ।