होलीमा हिंसात्मक झडपः मारिएका दुई युवा कांग्रेस कार्यकर्ता
बलेवा – होली पूर्णिमाका अवसरमा लागेको मेलामा दोहोरो झडपपछि दुई युवाको मृत्युका विषयमा अनुसन्धान गर्न प्रहरी प्रमुखको टोली घटनास्थलतर्फ लागेको छ । बागलुङको बडिगाड गाउँपालिका–१० दर्लिङ बल्देधुरीमा भएको घटनाका विषयमा अनुसन्धानका लागि जिल्ला प्रहरी प्रमुख प्रहरी उपरीक्षक कृष्णबहादुर पल्ली मगरको टोली घटनास्थलतर्फ लागेको हो ।
जिल्ला प्रहरी कार्यालय बागलुङका प्रहरी नायब उपरीक्षक इकवाल हवारीका अनुसार घटना भएलगत्तै मगरको कमाण्डमा ११ जनाको टोली बुर्तिबाङ प्रस्थान गरेको हो । आइतबार दिउँसो दुई समूहबीच झडप हुँदा दुई जनाको मृत्यु भएको थियो । हिजो राति नै गलकोटबाट प्रहरी निरीक्षकको टोली घटनास्थल पुगेको थियो । झडपपछि निसीखोला गाउँपालिका–७ का ३६ वर्षीय प्रकाश कुँवर र सोही ठाउँका ३४ वर्षीय दीपक दमाईको मृत्यु भएको हो ।
मृतकको शव परीक्षणका लागि बुर्तिबाङ प्राथमिक स्वास्थ्यचौकीमा हिजो राति नै ल्याइएको छ । उनीहरुको भिरबाट ५०० मिटर तल खसेको अवस्थामा शव भेटिएको थियो । अन्य केही बेपत्ता भएको भन्दै उनीहरुको खोजी भइरहेको छ । स्थानीयवासीका अनुसार दिउँसो मदिरा पिएर होली मनाउन जम्मा भएका युवाको बीचमा भनाभन हुँदा झडप भएको थियो ।
मृतक कुँवर र दमाई नेपाली कांग्रेसका जिल्ला सदस्यसमेत हुन् । नेपाली कांग्रेसले एक विज्ञप्ति जारी गर्दै मारिएका दुबै जना आफ्नो पार्टीको नेता भएको जानकारी दिएको छ। जिल्ला सभापति दिपेन्द्रबहादुर थापाले सोमबार विज्ञप्ति निकालेर घटनाका दोषीमाथि कडा कारवाही गर्न माग गरेका छन् ।
