काठमाण्डु- नेपाली कांग्रेसका उपसभापति विश्वप्रकाश शर्माले १५औँ महाधिवेशन पार्टीको नयाँ यात्राको सुरुवात भएको बताएका छन्। महाधिवेशनपछि कांग्रेस थप बलियो, ऊर्जाशील र नयाँ पुस्ताको भावनालाई समेटेर अघि बढ्ने उनले दाबी गरे।
महाधिवेशन उद्घाटन समारोहलाई सम्बोधन गर्दै शर्माले ८० वर्षको इतिहास बोकेको कांग्रेसले लोकतान्त्रिक आन्दोलनदेखि मुलुकका विभिन्न संकटमा महत्वपूर्ण भूमिका निर्वाह गरेको बताए।
जननायक बीपी कोइरालाको नेतृत्वमा स्थापित कांग्रेसले लोकतन्त्रका लागि गरेको संघर्षलाई नयाँ पुस्तासँग जोड्दै अघि बढ्नुपर्ने उनको भनाइ थियो।
फागुन २१ गतेको निर्वाचनपछि राष्ट्रिय स्वतन्त्र पार्टीको नेतृत्वमा बहुमतको सरकार बनेको र कांग्रेस प्रमुख प्रतिपक्षीको भूमिकामा रहेको उल्लेख गर्दै शर्माले राष्ट्रिय हितका विषयमा सरकारसँग सहकार्य गर्न कांग्रेस तयार रहेको बताए।
‘देशलाई सफल बनाउन आवश्यक विषयमा सरकारसँग हातेमालो गर्न कांग्रेस तयार छ। राष्ट्रिय हितका महत्वपूर्ण विषयमा राजनीतिक दलहरू एक ठाउँमा उभिनुपर्छ,’ उनले भने।
शर्माले जलवायु परिवर्तनले नेपालमा पारिरहेको असर, मधेस आन्दोलनले उठाएका सवाल र जेनेजी आन्दोलनका मागलाई सम्बोधन गर्नुपर्ने बताए।
‘दुई नेपाललाई जोड्नुपर्छ’
विदेशमा रहेका नेपालीलाई समेत नेपालको विकाससँग जोड्ने नीति आवश्यक रहेको शर्माले बताए। नागरिकता, लगानी र अधिकारका विषयलाई सम्बोधन गर्दै डायस्पोरामा रहेका नेपालीको भावना र पूँजीलाई नेपाल निर्माणमा उपयोग गर्नुपर्ने उनको भनाइ थियो।
‘नेपाल दुई वटा छ, नेपाल बाहिरको र नेपालभित्रको नेपाल। यी दुवै नेपाललाई जोड्नुपर्छ,’ शर्माले भने, ‘विदेशमा रहेका नेपालीले नेपालको विकासमा लगानी गर्न चाहेका छन्। उनीहरूको भावना र संविधानले परिकल्पना गरेको नागरिकताको विषयलाई सम्बोधन गर्न कांग्रेस तयार छ।’
नयाँ सरकार गठन भए पनि सामाजिक सञ्जालमा एकअर्काप्रति आक्रोश बढिरहेको उल्लेख गर्दै शर्माले अहिले नेपाली समाजमा संवाद, सद्भाव र एकताको आवश्यकता रहेको बताए।
‘हामीले भूगोललाई मात्रै होइन, नेपालीको मनलाई पनि जोड्नुपर्छ,’ उनले भने।
‘करिब ३५ हजार प्रतिनिधिमा ठूलो संख्या युवा’
विशेष महाधिवेशनपछि गगनकुमार थापाको नेतृत्वमा कांग्रेस नयाँ चरणमा प्रवेश गरेको उल्लेख गर्दै शर्माले १५औँ महाधिवेशनमा लोकतान्त्रिक आन्दोलनका अग्रजदेखि सहिद परिवार र जेनेजी पुस्तासम्मको सहभागिता रहेको बताए।
करिब ३५ हजार प्रतिनिधिमध्ये ठूलो संख्या युवा रहेको उल्लेख गर्दै उनले यसलाई कांग्रेसको नयाँ ऊर्जाका रूपमा व्याख्या गरे।
‘यो यात्राको सुरुवात हो। महाधिवेशनपछि बलियो कांग्रेससहित अगाडि आउने छौँ,’ शर्माले भने।
परम्पराको सम्मान गर्दै नयाँ दृष्टिकोण र ऊर्जाका साथ पार्टीलाई अघि बढाउने बताउँदै शर्माले महाधिवेशनले कांग्रेसलाई संगठनात्मक रूपमा थप बलियो बनाउने दाबी गरे।
त्यसले मुलुकको राजनीतिक, आर्थिक र सामाजिक रूपान्तरणमा कांग्रेसको भूमिका थप प्रभावकारी बनाउने उनको भनाइ थियो।
प्रतिक्रिया