ब्रेकिंग न्युज राजनीति

आगामी बजेटमा देखिएला दुईतिहाइको जादु ? प्रधानमन्त्री ओली ढुक्क !

काठमाडौं – संसदमा दुईतिहाइ बहुमत पाएर बनेको सरकारले गत वर्ष जेठ १५ गते ल्याएको बजेटपछि अर्थमन्त्री डा. युवराज खतिवडाको आलोचना भयो ।

Dish Home

प्रतिनिधिसभा बैठकमै सत्तारुढ नेपाल कम्युनिस्ट पार्टी (नेकपा)कै सांसदले अर्थमन्त्री खतिवडाको आलोचना गर्दै राजीनामा समेत मागे । कारण थियो – निर्वाचनका बेला वृद्धभत्ता पाँच हजार रुपैयाँ पुर्याउने भनेर गरिएको घोषणा कार्यान्वयन नहुनु ।

शक्तिशाली भनिएपनि पटक–पटक आलोचना खेप्नुपरेको प्रधानमन्त्री केपी शर्मा ओली नेतृत्वको सरकार वृद्धभत्ता नबढाएका कारण समेत वर्षभरि आलोचित बन्यो । नेकपाबाट निर्वाचित सांसदलाई गाउँघरमा गएको बेला सोधिने प्रश्न समेत बन्यो वृद्धभत्ता ।

आगामी आर्थिक वर्षका लागि बजेट आउन अब डेढ महिना मात्रै बाँकी छ । जेठ १५ गते संघीय बजेट संसदमा पेश हुनुपर्ने भनेर संविधानमै प्रावधान गरिएको छ । सरकारी निकाय र अर्थ मन्त्रालयले बजेटको तयारी गरिरहेको छ । गत वर्षको बजेट ल्याएका अर्थमन्त्री डा. खतिवडा यसपालि वृद्धभत्ता बढाउँलान् त ? वृद्धभत्ता बढेर ५ हजार नै पुग्ला कि थोरै मात्र बढ्ला ? ज्येष्ठ नागरिकमा यी प्रश्न अझै अनुत्तरित छन् ।

वृद्धभत्ताबारे विपक्षीले समेत पटक–पटक ओली सरकारलाई घेर्ने गरेको छ । तर आगामी बजेटमा वृद्धभत्ता बढ्ने भनेर प्रधानमन्त्री केपी शर्मा ओलीले नयाँ वर्षसँगै घोषणा गरेका छन् । ज्येष्ठ नागरिक स्वास्थ्य बिमा राष्ट्रिय अभियानको शुभारम्भ र ‘खोलौं बैंक खाता अभियान’ कार्यक्रमको उद्घाटन गर्दै प्रधानमन्त्री ओलीले भने, ‘यो बुढाबुढीको भलो चिताउने सरकार हो । यसपालिको बजेटमा वृद्धभत्ता बढ्छ । ढुक्क भए हुन्छ ।’

‘पहिला पहिला बुढाबुढीलाई कति वर्ष पुग्नुभयो भन्दा ६८ वर्ष पुगियो । अब कति बाँचिएला र भन्थे,’ कार्यक्रममा प्रधानमन्त्री ओलीले भने, ‘यतिबेला वृद्धभत्ता पाउन अब दुई वर्ष बाँकी छ भन्छन् । वृद्धवृद्धाहरूमा जीवनप्रतिको आशा बढेको छ ।’ प्रधानमन्त्री ओलीले सामाजिक सुरक्षाका हरेक क्षेत्रमा सरकारको ध्यान पुगेको बताए ।

ओली सरकारको पहिलो बजेटमा आकर्षक र लोकप्रिय कार्यक्रम घोषणा भएका थिएनन् । निर्वाचनमा लोकप्रिय नारा दिएर झण्डै दुईतिहाइ बहुमत ल्याएको नेकपा सरकारको ‘सामान्य’ बजेटबाट सर्वसाधारणमा निराशा हुनु स्वभाविक पनि थियो । आगामी बजेटमा त्यो निराशालाई हटाएर आशा जागृत गर्नुपर्ने जिम्मेवारी सरकारसामु रहेको छ । अर्थमन्त्री डा. खतिवडाले सत्तारुढ सांसदको भावना र सरकारी आवश्यकतालाई बुझेर आगामी बजेट ल्याउन सक्लान् ?

ओली सरकार बनेको एक वर्षको बीचमा मन्त्रीहरू फेरबदल हुने चर्चा पनि चल्यो । अर्थमन्त्री खतिवडाले राम्रो काम गर्न नसकेको भन्दै उनलाई बर्खास्त गर्नुपर्ने माग समेत सत्तारुढ सांसदले राखेका थिए । गैरराजनीतिक व्यक्तिलाई महत्वपूर्ण मन्त्रालयको जिम्मेवारी दिइएको भन्दै पार्टीभित्र शुरूदेखि नै अर्थमन्त्रीको नियुक्ति विवादित समेत भयो । अर्थमन्त्री डा. खतिवडाले डेढ महिनापछि ल्याउने आगामी बजेट उनको यो कार्यकालको अन्तिम बजेट हुनेछ ।

राष्ट्रियसभा सदस्य नियुक्त भएर अर्थमन्त्री बनेका खतिवडाको दुई वर्षसम्म मात्रै सदस्य हुन पाउने गरी चिठ्ठा परेको थियो । उनको २ वर्ष आगामी आर्थिक वर्षभित्रै सकिने छ । उनको राष्ट्रियसभा सदस्य पदावधि समाप्तिसँगै अर्थमन्त्रीको पद समेत गुम्ने छ ।

विज्ञ अर्थमन्त्री भनेर चिनिने डा. युवराज खतिवडाले जनस्तरमा स्थापित हुने गरी आफ्नो छवि देखाउने अन्तिम अवसर आगामी बजेट नै हो । आगामी बजेटमा लोकप्रिय र आकर्षक कार्यक्रम ल्याउन नसके अर्थमन्त्री खतिवडाको क्षमतामाथि सदैव प्रश्नचिह्न लागिरहने छ भने सायद उनले क्षमता देखाउने अवसर समेत नपाउन सक्छन् । यी सबै अवस्था बुझेका अर्थमन्त्री डा. खतिवडाले ल्याउने बजेट अर्थपूर्ण हुने आकलन गर्न सकिन्छ ।

Comments

comments

Now Get KathmanduPati App on your mobiles.

Android App iOS App
ad

धेरै पढिएको समाचार

Vianet
Civil
Prabhu Bank
Shivam Cement
Yeti Airlines
Kumari Bank
Shikhar Insurance
Salt Trading
Nepal Life Insurance

Now get KathmanduPati App on your mobiles.

Android App iOS App
Scroll to Top