काठमाण्डु– प्रमुख प्रतिपक्षी नेपाली कांग्रेसका सांसद् खड्ग शाहीले प्रधानमन्त्री बालेन्द्र शाह (बालेन) को मुस्ताङ भ्रमणलाई निजी भ्रमण भनिए पनि सोही समयमा अमेरिकी पक्षका प्रतिनिधि पनि मुस्ताङ पुगेको दाबी गरेका छन् ।

सोमबार प्रतिनिधिसभा बैठकमा बोल्दै शाहीले प्रधानमन्त्रीको मुस्ताङ भ्रमण र अमेरिकी प्रतिनिधिको मुस्ताङमा भएको भनिएको उपस्थितिबारे सरकारको आधिकारिक धारणा माग गरे ।

प्रधानमन्त्रीसँग अमेरिकी अधिकारीको भेट भए÷नभएको स्पष्ट गर्न माग गर्दै उनले कोसँग र के विषयमा कुराकानी भएको भन्नेबारे सदन र जनतालाई जानकारी दिइनुपर्ने उनको भनाइ थियो ।

‘प्रधानमन्त्रीको मुस्ताङ भ्रमणलाई निजी भ्रमण भनिएको छ’, शाहीले भने, ‘तर, सोही समयमा अमेरिकी पक्षका प्रतिनिधि अधिकारी मुस्ताङ पुगेको चर्चा सार्वजनिक भएको छ ।’

अमेरिकी दूतावासका सार्वजनिक मामिला प्रमुख माइक हार्कर मुस्ताङ पुगेको दाबी गर्दै उनले उनी त्हयाँ जानुको उद्देश्य सरकारले स्पष्ट गर्नुपर्ने बताए ।

उनले सरकारसँग अमेरिकी प्रतिनिधिमण्डलमा को–को मुस्ताङ पुगेका थिए, उनीहरूको पदीय जिम्मेवारी के हो भन्नेबारे स्पष्ट जानकारी चाहिने उल्लेख गरे ।
‘अमेरिकी प्रतिनिधि को–को मुस्ताङ पुगेका थिए ? उनीहरूको पद र जिम्मेवारी के हो ? उनीहरू मुस्ताङ किन गएका हुन् ? शाहीले प्रश्न गरे ।

प्रधानमन्त्री र अमेरिकी प्रतिनिधिबीच मुस्ताङमा भेटघाट वा छलफल भएको थियो कि थिएन भन्ने विषयमा पनि सरकारले स्पष्ट पार्नुपर्ने शाहीको भनाइ छ ।

भेटघाट भएको भए त्यसको विषय र छलफलका क्रममा भएका समझदारीबारे समेत संसदलाई जानकारी गराउनुपर्ने माग गरे ।

‘प्रधानमन्त्री र अमेरिकी प्रतिनिधिबीच मुस्ताङमा भेटघाट वा छलफल भएको हो वा होइन ? यदि भएको हो भने कुन विषयमा के–कस्ता समझदारी र छलफल भएको हो ?’ शाहीले भने ।

मुस्ताङ भ्रमणसँग जोडिएको विषय नेपालको परराष्ट्र नीति तथा राष्ट्रिय सुरक्षासँग सम्बन्धित भएकाले सरकारले तत्काल संसद र नेपाली जनतालाई तथ्यसहित जानकारी गराउनुपर्ने उनको माग छ ।