काठमाण्डु –नेपाली कांग्रेसको डा. शेखर कोइरालाले नेतृत्व गरेको संस्थापन इतर समूहले मन्त्री बन्नेको नाम टुंग्याएर सिफारिस गरेको छ । टुंगो लगाइएका नाम नेता डा. कोइरालाले सभापति शेरबहादुर देउवालाई बुझाएका पनि उनी निकट स्रोतले जानकारी दियो ।

इतर समूहले चार मन्त्रालय पाउनु पर्ने दाबीसहित ४ नेताको नाम मन्त्रीका लागि सिफारिस गरेको हो । सुर्खेतका हृदयराम थानी, धादिङका रामनाथ अधिकारी, काठमाडौंका प्रदीप पौडेल र सप्तरीका तेजुलाल चौधरीको नाम मन्त्रीमा सिफारिस गरेको निकटस्थ स्रोतले जानकारी दियो । चारै नेता प्रत्यक्ष निर्वाचित सांसद हुन् ।

मन्त्री बन्न आकांक्षा राखेका नेताहरू अर्जुननरसिंह केसी, सहमहामन्त्रीद्वय बद्री पाण्डे र जीवन परियारलाई सिफारिस नगरेर नयाँ नेताहरूलाई सिफारिस गरिएको हो । सिफारिस नेताहरूमध्य थानी मात्रै एक पटक मन्त्री भएका नेता हुन् ।

समूहको बिहान बसेको बैठकले मन्त्री छान्ने जिम्मेवारी डा. कोइराला, उपसभापति धनराज गुरुङ र महामन्त्री गगन थापालाई जिम्मेवारी दिएको थियो । नेताहरूले छानेर सिफारिस गरेका हुन् ।