काठमाण्डु – ऊर्जा, जलस्रोत तथा सिँचाइमन्त्री दिपक खड्काले ऊर्जा अब केवल उज्यालो दिने माध्यम मात्र नभई मुलुकको समृद्धिसँग गाँसिएको विषय भएको उल्लेख गरेका छन् ।

बिहीबार काठमाण्डुमा आयोजित ऊर्जा, जलस्रोेत तथा सिँचाइ मन्त्रालय विद्युत् विकास विभागको ३२औं वार्षिकोत्सव समारोहलाई सम्बोधन गर्दै उनले निर्माण कार्यलाई तीब्रता दिनका लागि काम गरिरहेको बताए ।

उनले ऊर्जा क्षेत्र विकासका लागि व्यक्तिगतभन्दा सामूहिक अधिकार बढी आवश्यक हुने जानकारी दिए । खड्काले अब भाषण मात्र गरेर होइन, जनताको अपेक्षाअनुसार छिटो र प्रभावकारी काम गरेर परिणाम देखाउने बेला आएको बताए ।

‘हामीले भाषण धेरै गर्‍यौं, अब साँच्चिकै काम गर्ने समय हो । यदि नीति र नियमले काम रोकिएको छ भने तिनमा सुधार गरेर भए पनि अघि बढ्नुपर्छ । ऊर्जा अब केवल उज्यालो दिने माध्यम होइन, यो मुलुकको समृद्धिसँग गाँसिएको विषय हो,’ उनले भने ।

मन्त्री खड्काले देशभरको हरेक चुल्होमा विद्युत् पुगोस् भन्ने सरकारको लक्ष्य रहेको उल्लेख गरे । उनले वर्तमान सरकारको प्राथमिकता देशको समृद्धि साझेदारीको आधारमा सुनिश्चित गर्ने रहेको उल्लेख गरे ।

‘कृत्रिम बौद्धिकताको युगमा प्रवेश गरिसकेका छौं, यो युग चलाउन ऊर्जा अनिवार्य छ । त्यसैले हामीले उत्पादन मात्र होइन, प्रसारण र वितरणतर्फ पनि विशेष ध्यान दिनुपर्छ,’ उनले भने ।

खड्काले जमिन अधिग्रहण, प्रसारण लाइन विस्तार र संरचनागत अड्चनलाई हटाउन नीति–नियमको पुनरावलोकन गर्ने स्पष्ट संकेत दिए । सरकार र निजी क्षेत्रको सहकार्यले मात्रै स्थायित्व र प्रभावकारिता आउने उनले दाबी गरे ।

यस वर्ष ४३२ मेगावाट जलविद्युत् तथा ३५ मेगावाट सौर्य ऊर्जा उत्पादन गरेर योगदान दिने निजी तथा सरकारी पक्षप्रति धन्यवाद ज्ञापन गर्दै मन्त्री खड्काले भने, ‘मुलुकको समृद्धि सरकार वा मन्त्री मात्रको दायित्व होइन, यो साझा प्रयास हो । त्यसैले सबै तह र तप्काले आफ्नो जिम्मेवारी निर्वाह गर्नुपर्छ ।’

समारोहमा ऊर्जा मन्त्रालयका सचिवहरू सुरेश आचार्य एवं सरिता दवाडी, ऊर्जा तथा जलस्रोत आयोगको सचिवालका प्रमुख सचिव दिनानाथ मिश्र, विद्युत् नियमन आयोगका अध्यक्ष डा. रामप्रसाद धिताल, नेपाल विद्युत् प्राधिकरणका कार्यकारी निर्देशक हितेन्द्रदेव शाक्य, स्वतन्त्र विद्युत् उत्पादकहरूको संस्था इप्पानका वरिष्ठ उपाध्यक्ष मोहन डाङ्गी, सल्लाहकार, विभागीय प्रमुखहरू, विभिन्न विद्युत् कम्पनीका प्रतिनिधिहरू, निजी क्षेत्रका अग्रज तथा विशेषज्ञहरूको उपस्थिति थियो ।

विद्युत् विकास विभागका महानिर्देशक नविनराज सिंहको अध्यक्षतामा सम्पन्न समारोहमा विद्युत् विकास विभागले प्रकाशन गरेको ‘विद्युत् प्रवर्द्धन स्मारिका–२०८२’लाई प्रमुख अतिथि ऊर्जामन्त्री खड्काले विमोचन गरे ।

कार्यक्रममा सेवानिवृत्त कर्मचारीहरू मधुप्रसाद भेटवाल (सचिव पदबाट अवकाश), अरुण कुमार झा (उपमहानिर्देशकबाट अवकाश) र सरिता प्रधानलाई सम्मान गरिएको थियो । आर्थिक वर्ष २०८१/०८२ मा निर्माण सम्पन्न गरेका २० वटा विद्युत् आयोजनाहरूका प्रवर्द्धकहरूलाई सम्मान गरिएको थियो ।