काठमाण्डु – साउदी अरबको रक्षाका लागि आफ्नो सेनालाई परिचालन गर्ने सम्भावनाबारे इजिप्टको संसद्मा हुने मतदान २६ अक्टोबरसम्मका लागि स्थगित भएको छ ।

रोयटर्सका अनुसार साउदी अरबले सैन्य सहयोग मागेमा आफ्नो सेना परिचालन गर्न अनुमति दिने वा नदिने विषयमा इजिप्टको संसद्मा यसै हप्ता मतदान हुने तय भएको थियो ।

तर मतदान २६ अक्टोबरसम्मका लागि सारिएको छ । मतदान स्थगित हुनुको कारणबारे भने विस्तृत जानकारी सार्वजनिक भएको छैन ।

यद्यपि हुथीविरूद्ध साउदीलाई सहयोग दिँदा निम्तिन सक्ने सम्भावित सुरक्षा चुनौतीलाई लिएर थप छलफलका लागि इजिप्टले यो कदम चालेको हुन सक्ने अनुमान गरिएको छ ।

सैन्य शिविरमा लक्षित आक्रमण

यसैबिच यमनको शब्वा प्रान्तमा हुथी विद्रोहीले गरेको ब्यालिस्टिक मिसाइल आक्रमणमा करिब ४० जना मारिएका वा घाइते भएका छन् ।

यमनको पूर्वी शब्वा प्रान्तमा हुथी विद्रोहीले सैन्य शिविरलाई लक्षित गरी गरेको ब्यालिस्टिक मिसाइल आक्रमणमा करिब ४० जना हताहत भएका छन् ।

अनादोलु समाचार एजेन्सीका अनुसार प्रान्तका उपगभर्नरले आक्रमणमा मानिसहरू मारिएको र घाइते भएको जानकारी दिएका छन् ।

स्थानीय सञ्चारमाध्यम यमन मनिटरले पनि प्रारम्भिक विवरण उद्धृत गर्दै कम्तीमा ४० जना हताहत भएको जनाएको छ । तर मृतक र घाइतेको छुट्टाछुट्टै संख्या खुलाइएको छैन ।

शब्वा प्रान्तको जर्दान जिल्लास्थित अल–अलम सैन्य शिविरमा मिसाइल प्रहार भएको हो । शिविरमा सुरक्षा बलमा भर्ती हुनुअघि तालिम लिइरहेका नयाँ सदस्यहरू रहेको बताइएको छ ।

यमनको सशस्त्र बलका प्रवक्ताले हुथीहरूले शब्वा प्रान्तमा ३ वटा ब्यालिस्टिक मिसाइल प्रहार गरेको बताएका छन् । ती मिसाइल सुरक्षा निकाय र प्रहरीका कर्मचारीलाई तालिम दिइने केन्द्रमा खसेको उनको भनाइ छ ।

यमनी सेनाले हुथी समूहले देशका विभिन्न प्रान्तमा यमनी नागरिकलाई जानाजानी निशाना बनाएको आरोप लगाएको छ । आक्रमणबारे हुथी समूहले तत्काल कुनै प्रतिक्रिया दिएको छैन ।

साउदी अरबमा सुरक्षा चेतावनी हटाइयो

यसैबिच साउदी अरबको नागरिक सुरक्षा निर्देशनालयले मिसाइल तथा ड्रोन अवरोध गर्ने कारबाही र आक्रमण भएका स्थानसम्बन्धी सामग्री खिच्ने, प्रकाशन गर्ने वा सामाजिक सञ्जालमा साझा गर्ने व्यक्तिमाथि कानुनी कारबाही हुन सक्ने चेतावनी दिएको छ ।

अनादोलुका अनुसार निर्देशनालयले सामाजिक सञ्जाल एक्समार्फत यस्तो चेतावनी दिएको हो । सैन्य कारबाही तथा आक्रमणस्थलका तस्बिर र सूचनाले सुरक्षा जोखिम निम्त्याउन सक्ने भएकाले नागरिकलाई त्यस्ता सामग्री सार्वजनिक नगर्न आग्रह गरिएको छ ।

यसैबिच साउदी अरबको दक्षिणी क्षेत्र नज्रानमा जारी गरिएको सुरक्षा चेतावनी हटाइएको छ । नागरिक सुरक्षा निर्देशनालयले तत्कालको खतरा टरेको जनाउँदै स्थानीय बासिन्दालाई सुरक्षा निर्देशन पालना गर्न र घटनास्थलमा भीड जम्मा नगर्न आग्रह गरेको छ ।

मध्यपूर्वमा साउदी अरबको सुरक्षा चासो, यमनको जारी द्वन्द्व र क्षेत्रीय सैन्य सहयोगसम्बन्धी घटनाक्रमले क्षेत्रीय सुरक्षा अवस्थालाई थप संवेदनशील बनाएको छ ।