पोखरा – नेपाली कांग्रेसका सभापति गगनकुमार थापाले पार्टीभित्रको आन्तरिक तिक्ततालाई अन्त्य गर्नुपर्ने बताएका छन् ।

बीपी स्मृति पुस्तकालय गण्डकी प्रदेशद्वारा मंगलबार पोखरामा आयोजित सम्मान कार्यक्रममा सभापति थापाले पार्टीबाट टाढिएका मतदाताको घरदैलोमा पुगेर कांग्रेसले पुन: संवाद थाल्ने जानकारी दिए ।

उनले ११३औँ बीपी जयन्तीका अवसरमा विगतमा कांग्रेससँग आबद्ध रहेका तर पछिल्लो समय अलग भएका परिवारसँग विशेष अभियान सञ्चालन गरी जोडिनुपर्ने धारणा राखे । सभापति थापाले भने, ‘२ लाखभन्दा बढी परिवारहरू अहिले हामीसँग अलग हुनुभएको छ । ती अलग भएका परिवारलाई हामीले खोज्नुपर्‍यो । उहाँहरूसँग संवाद गर्नुपर्‍यो ।’

पार्टीमा २०–८० वर्षसम्मका ४ पुस्ता क्रियाशील रहेको उल्लेख गर्दै सभापति थापाले पाका नेताको अनुभव र युवाहरूको ऊर्जाको संयोजनबाट मात्र नतिजा हासिल हुने स्पष्ट पारे ।

आफ्नो ४ वर्षे कार्यकालमा निष्ठापूर्वक काम गर्ने प्रतिबद्धता व्यक्त गर्दै उनले नेताहरूलाई भड्किलो शैली त्यागेर गाउँ–गाउँमा खटिन निर्देशन दिए । आगामी स्थानीय तहको निर्वाचनमा उम्मेदवार छनोटको सम्पूर्ण अधिकार तल्लो तहलाई दिइने सभापति थापाले बताए । सभापति थापाले नेपाली कांग्रेसमा रहेर विशिष्ट योगदान पुर्‍याएका गण्डकी प्रदेशका ११ जिल्लाका १–१ जनालाई सम्मान गरेका थिए ।

सम्मानित हुनेहरूमा नवलपुरका सुमित्रादेवी खनाल, गोरखाका राममणि धिताल, लमजुङका नवीन बानियाँ, तनहुँका झपटबहादुर केसी, मनाङका पेम्बा दोर्जे लामा, कास्कीका कृष्णबहादुर कुँवर, स्याङ्जाका शालिकराम न्यौपाने, पर्वतका बलभद्र शर्मा, बागलुङका हरिप्रसाद श्रेष्ठ, म्याग्दीका पृथ्वीमान छन्त्याल र मुस्ताङका सोनम धोर्जे विष्ट छन् ।

उनीहरूलाई जनही २५ हजारसहित सम्मानपत्र र दोसल्लाले सम्मान गरिएको छ ।