यानको नेतृत्वको चिनियाँ प्रतिनिधिमण्डल राजनीतिक भेटघाटमा सक्रिय!
काठमाण्डु- नेपाल भ्रमणमा रहेको कम्युनिष्ट पार्टी अफ चाइना (सिपिसी) को युनान प्रान्तको स्थायी समिति सदस्य तथा प्रान्तीय प्रचार विभाग प्रमुख जेङ यानको नेतृत्वको टोलीले आज उपराष्ट्रपति रामसहायप्रसाद यादवसँग शिष्टाचार भेटवार्ता गरेको छ।
भेटवार्ताका क्रममा दुई देशबीच रहिआएको सौहार्द्रपूर्ण सम्बन्धलाई थप प्रगाढ बनाउन चाल्न सकिने कदमबारे छलफल भएको उपराष्ट्रपतिको कार्यालयले जनाएको छ। सो अवसरमा उपराष्ट्रपति यादवले नेपाल र चीनबीचको सम्बन्ध शान्तिपूर्ण, सहअस्तित्वका सिद्धान्त, मित्रता, आपसी सहयोग एवं साझेदारी, एकअर्काको आधारभूत चासो तथा संवेदनशीलताको जगमा बलियोसँग उभिएको बताए।
उपराष्ट्रपति यादवले मित्रराष्ट्र चीन नेपालको प्रमुख एवं लामो समयदेखिको विकास साझेदार रहिआएको बताए। उनले गत अगस्तमा चीन भ्रमणका क्रममा युनान प्रान्तबाट पाएको अतिथि सत्कारको प्रशंसा गर्दै युनानको कुनमिङ्गमा सातौँ चाइना–साउथ एसिया एक्स्पोजिसन र २७औँ चाइना (कुनमिङ) इम्पोर्ट एन्ड एक्स्पोर्ट फेयर सफलतापूर्वक आयोजना गरेकामा टोलीसमक्ष धन्यवाद व्यक्त गरे।
‘नेपालको कूल बाह्य व्यापारमध्ये चीनसँगको हिस्सा करिब १४ प्रतिशत रहेकामा यसलाई वृद्धि गर्न सकिने सम्भावनाहरु धेरै छन्’, उपराष्ट्रपति यादवले भने, ‘द्विपक्षीय व्यापारलाई दिगो र व्यापक बनाउन चिनियाँ पक्षलाई तुलनात्मक लाभका विभिन्न उत्पादनहरुमा उत्पादक क्षमता बढाउनाका साथै तरकारी, मासुजन्य उत्पादन, चिया र जडीबुटी जस्ता उत्पादनहरूको निकासी गर्न अनुरोध गर्दछु।’
उपराष्ट्रपति यादवले सुमधुर द्विपक्षीय सम्बन्धका आयामहरुमध्ये जनस्तरको सम्बन्ध एउटा महत्वपूर्ण आयाम रहेकाले दुई देश बीचको सम्बन्ध जनस्तरमा अझै सुदृढ हुनेमा आफू विश्वस्त रहेको समेत बताए। चिनियाँ भ्रमण टोलीका नेतृत्व गरिरहेकी जेङ यानले आफूहरूको यो भेटघाट उपलब्धिमूलक रहेको बताउँदै दुई देशको सम्बन्धलाई थप प्रगाढ, सुदृढ र बलियो बनाउन आफ्नो स्तरबाट प्रयास गर्ने बताइन्।
यानको नेतृत्वको टोलीले टोली राजनीतिक भेटघाटमा जोड दिएको छ । राजनीतिक भेटघाटसँगै सांस्कृतिक र पुरातात्विक क्षेत्र पनि यो टोलीले अवलोकन गर्दैछ। मंगलबार बिहान यो टोलीले भक्तपुर दरबार स्क्वायर अवलोकन गर्ने कार्यतालिका छ।
मंगलबार नै दिउँसो चिनियाँ टोलीले गठबन्धन सरकारका प्रवक्ता एवम् सञ्चार तथा सूचना प्रविधि मन्त्री रेखा शर्मासँग द्विपक्षीय भेटवार्ता गर्ने तयारी छ। टोलीले नेपालका सञ्चारमाध्यमको पनि अवलोकन गर्ने भएको छ। यो टोलीले बुधबार सरकारी सञ्चारमाध्यम नेपाल टेलिभिजनको अवलोकन गर्नेछ।
त्यसपछि यो टोली सिंगापुर हुँदै चीन फर्किने भएको छ। पछिल्लो समय चीनको युन्नान सहर पर्यटकीय र सांस्कृतिक केन्द्र बन्दै गएको छ। नेपालमा पछिल्लो समय अमेरिकी अधिकारीहरुको सक्रियता बढिरहेका बेला चीनले पनि आफ्नो टोली विभिन्न समयमा पठाइरहेको छ।आर्थिक सहायता परियोजना एमसीसी कार्यान्वयनमा गएसँगै अहिले अमेरिकी अधिकारीहरुले नेपालमा उपस्थिति बढाइरहेका छन्।
