काठमाण्डु– राप्रपा संसदीय दलका नेता ज्ञानबहादुर शाहीले कर्णालीका जनता सवारी दुर्घटनामा परेर नदीमा बगिरहँदा राज्यले उद्धारमा चासो नदिएको छर, त्यही समयमा नदी माथिबाट मन्त्रीको हेलिकोप्टर उडेको भन्दै आपत्ति जनाएका छन् ।

सोमबार प्रतिनिधिसभा बैठकमा बोल्दै शाहीले दुर्घटनाका घाइतेले ज्यान बचाइदिन हारगुहार गर्दा राज्य संवेदनहीन भएर बसेको आरोप लगाए । शाहीले घाइते जनतालाई बचाउन हेलिकप्टर उपलब्ध नहुने, तर मन्त्री शयर गर्न भने हेलिकोप्टर उपलब्ध हुनुको कारणबारे छानबिनको माग गरे ।

सुर्खेतबाट कालीकोटतर्फ जाँदै गरेको क. प्र.०२–००१ ख १०५५ नम्बरको फोर्स गाडी गत असार १८ गते दैलेखको चामुण्डाबिन्द्रासैनी नगरपालिका–७ स्थित साँगेताडाबाट सडकबाट करिब चारसय मिटर तल खसेर कर्णाली नदीमा डुबेको थियो । दुर्घटनामा बेपत्ता भएकाहरुको खोजी जारी छ ।

‘कर्णालीमा १८ गते गाडी नदीमा खस्यो । मान्छेहरु गुहार मागिरहेका थिए । मलाई बचाउ भनिराखेका थिए । एक जना मानिस भीरमा अड्किएर ज्यानको भिख मागिराख्नुभएको थियो । डाँको लगाउँदा लगाउँदै स्वर सुक्यो, उहाँको जीवन गयो । गाडी नदीमा खस्यो । कर्णालीका नागरिकको ज्यान गयो तर, उद्धार आएन’, शाहीले भने, ‘त्यही बेला आकाशमा एउटा हेलिकप्टर देखियो । तर, त्यो उद्धारका लागि थिएन । मन्त्रीज्यूको सवारीका लागि थियो । सरकारका केन्द्रीय मन्त्री कर्णलीको आकाशमा घुमिरहनुभएको थियो ।’

शाहीको संकेत ऊर्जा, जलश्रोत तथा सिंचाइमन्त्री बिराजभक्त श्रेष्ठमाथि थियो । मन्त्री श्रेष्ठ १९ असारमा डोल्पामा निर्माणाधीन १०६ मेगावाट क्षमताको जगदुल्ला अर्धजलाशययुक्त जलविद्युत् आयोजनाको मुख्य सुरुङ निर्माण कार्यको शुभारम्भ गर्न हेलिकप्टरमा गएका हुन् ।

श्रेष्ठ डोल्पाको मुड्केचुला गाउँपालिका–४ इलामा सुरुङ निर्माणको शुभारम्भ गरेर काठमाण्डु फर्किएका थिए ।

शाहीले उद्धारमा भएको लापरबाही र नागरिकको अनाहकमा ज्यान गएको विषयमा छानबिन गर्नका लागि सरकारलाई तत्काल रुलिङ गर्न सभामुख डोलप्रसाद अर्यालको ध्यानाकर्षण गराए ।

शाहीले कर्णाली नेपालमा पर्छ कि पर्दैन र कर्णालीका मानिस नेपाली हुन् कि होइनन् ? भन्दै प्रश्न गरे । आफूले उद्धारका लागि सशस्त्र प्रहरी महानिरीक्षक नारायणदत्त पौडेल र कर्णाली प्रदेशका डिआईजीलाई फोन गरेको तर, उद्धार सामग्री नभएको जवाफ पाएको शाहीले बताए । कर्णालीमा आफूले दुर्घटना नभई सरकारको असक्षमता र गैरजिम्मेवारी देखेको शाहीले उल्लेख गरे ।
उनले सरकारले कसका लागि काम गरिरहेको छ र भाषण कसका लागि गरिरहेको छ भन्ने प्रश्न गरे । ‘मन्त्रीको हेलिकप्टर आकाशमा उडिरहँदा एउटा हेलिकप्टर पठाउने क्षमता यो सरकारसँग भएन । काम कसका लागि गरिरहेका छौं ? भाषण कसका लागि ठोकिरहेका छौं हामी ?’ उनले भने, ‘ २४ घण्टा बित्यो एउटा हेलिकप्टर पनि गएन । भीरमा अड्केको मानिसबचाउन सकिन्थ्यो । सुरक्षाकर्मी पुग्यो, मानिस बचाउन होइन, मरेका मानिसको मुचुल्का उठाउन’, उनले भने ।

आफूले उठाएको विषय कसैलाई राजनीतिक रुपमा लाग्न सक्ने र कसैलाई भावुकता लाग्न सक्ने भन्दै उनले आफ्ना मान्छे गुमाएकाहरुलाई मात्र जीवनको मूल्य थाहा हुने बताए । ‘म सरकार र यो सदनसँग एउटा प्रश्न सोध्न आएको छु । कर्णाली यो देशमा पर्छ कि पर्दैन ? जवाफ चाहियो । मन्त्रीहरु हेलिकप्टरमा सयर गर्दा कर्णालीमा नागिरक मर्दा उद्धार गर्न नहुने ? कर्णालीका जनता यो देशका नागरिक हुन कि होइनन् ? कर्णालीका नागरिकहरुले बाँच्न पाउने अधिकार छ या छैन ? कर्णालीका युवाहरु यो देशका भविष्य हुन या होइनन ? के कर्णालीमा जन्मनु हाम्रो अभिसाप हो ?’, शाहीले प्रश्न गरे ।

उनले संसदबाट विपदका बेला हेलिकप्टर प्रयोग गर्ने गफ दिने सरकारका गृहमन्त्री सुधन गुरुङ र उनका स्वकीय सचिवले आफूले पटकपटक फोन गर्दा नउठाएको भन्दै शाहीले आक्रोश पोखे ।

‘आकाशमा मन्त्रीको हेलिकप्टर उडिरहँदा नदीमा नागरिकहरु डुबिरहेका थिए । यो दृष्य केबल एउटा दुर्घटना होइन, राज्यको संवेदनहीनताको एउटा प्रमाण हो । त्यसैले सभामुखमार्फत सरकारसँग स्पष्ट जवाफ चाहन्छु । कर्णालीका मानिसको ज्यानको मुल्य कति हो ? सभामुखलाई १०औंला जोडेर बिन्ती गर्छु । सरकारलाई रुलिङ गर्नुस् । घटनाको सत्यतथ्य सार्वजनिक गर्न, उद्धारमा भएको ढिलाइको जिम्मेवारी निर्धारण गर्न रुलिङको माग गर्न चाहन्छु’, सांसद् शाहीले भने ।