रक्षामन्त्री उप्रेतीले गरे सैनिक मुख्यालय जङ्गी अड्डाको निरीक्षण
काठमाण्डु – रक्षामन्त्री हरिप्रसाद उप्रेतीले सोमबार जङ्गी अड्डाको निरीक्षण भ्रमण गरेका छन् ।
रक्षा मन्त्रीमा नियुक्त भएपश्चात् उप्रेतीले जङ्गी अड्डा पुगेर नेपाली सेनाबारे औपचारिक जानकारी लिएका छन् ।
जङ्गी अड्डामा आयोजित कार्यक्रममा मन्त्री उप्रेतीसमक्ष नेपाली सेनाको संगठनात्मक स्वरूप, तैनाथी, स्वदेश र अन्तर्राष्ट्रिय क्षेत्रमा नेपाली सेनाले सञ्चालन गरिरहेका विविध गतिविधिबारे जानकारी गराइएको छ ।
कार्यक्रमका दौरान प्रधानसेनापति प्रभुराम शर्माले नवनियुक्त रक्षामन्त्री उप्रेतीलाई बधाई ज्ञापन गर्र्दै नेपाली सेनाका सकलदर्जाको तर्फबाट जङ्गी अड्डामा स्वागत गरे । उनले संविधानप्रदत्त जिम्मेवारीका अलावा नेपाल सरकारबाट विधिसम्मत ढंगले प्राप्त विकास निर्माण लगायत विविध जिम्मेवारीहरू समयमा नै पूरा गर्न सेना सदैव कटिबद्ध रहेको बताए ।
सेनाले जिम्मेवारीहरू पूरा गर्ने क्रममा आइपर्ने चुनौतीलाई नियमसम्मत रूपमा रक्षा मन्त्रालयबाट सम्बोधन हुँदै आइरहेको र सोको प्रभावकारी निरन्तरता हुनेमा विश्वस्त रहेको उनले बताए । उनले नेपाली सेनाले विश्व शान्ति स्थापनार्थ गरिरहेका कार्यहरूले अन्तर्राष्ट्रिय जगतमा नेपाल र नेपाली सेना दुवैको साख बढाउनुका साथै सैन्य कूटनीति प्रवर्द्धन एवं अन्तर्राष्ट्रिय सम्बन्ध विस्तारमा समेत सकारात्मक प्रभाव परेको बताए ।
संयुक्त राष्ट्रसंघसँगको सहकार्यलाई थप मजबुत र बृहत् बनाउन राष्ट्रिय रूपमै एकीकृत नीति/रणनीति अख्तियार गर्न आवश्यक रहेको उनले बताए । उनले बाह्य तथा आन्तरिक सुरक्षा प्रणालीलाई सुदृढ बनाई राष्ट्रको आधारभूत मूल्यमान्यताको रक्षा एवं जनताको विकास र समृद्धिको अभिलाषालाई पूरा गर्न समेत नेपाली सेनाको समयानुकूल आधुनिकीकरण गर्दै लैजान आवश्यक रहेको बताए ।
कार्यक्रममा रक्षामन्त्री हरिप्रसाद उप्रेतीले राष्ट्रिय स्वतन्त्रता, सार्वभौमिकता, भौगोलिक अखण्डता, स्वाधीनता तथा राष्ट्रिय एकताको रक्षार्थ नेपाली सेनाले निर्वाह गर्दै आएको अहम् भूमिकाका साथै विकास निर्माण, विपद् व्यवस्थापन, नागरिक सहयोग, खेलकुद एवं विश्व शान्ति स्थापनामार्फत अन्तर्राष्ट्रिय क्षेत्रमा नेपालको पहिचान स्थापित गराउन सेनाले निर्वाह गरेका विविध गतिविधि एवं पहलता सम्बन्धी विस्तृत जानकारीका लागि धन्यवाद ज्ञापन गरे ।
कार्यक्रममा रक्षामन्त्री उप्रेतीले नेपाली सेनाले आफूलाई प्राप्त जिम्मेवारीहरू सदैव उच्च दक्षता एवं व्यावसायिकताका साथ सम्पन्न गर्नुका साथै विषम परिस्थितिमा नेपाली जनताको भरोसाको केन्द्रको रूपमा रही आएको बताए । उनले विपद्को समयमा जनताको सुरक्षाको लागि नेपाली सेनाले देखाएको व्यावसायिक क्षमता प्रदर्शन, वन्यजन्तु तथा पर्यावरण संरक्षणप्रतिको योगदान एवं राष्ट्रिय एकता प्रवर्द्धनमा गरेका उल्लेखनीय कार्यहरूका कारण सेनाप्रति नेपाली जनताको उच्च विश्वास, भरोसा र सम्मान रहेको कुरा व्यक्त गर्दै यसलाई निरन्तर कायम राख्न प्रयत्नशील रहनेमा आफू विश्वस्त रहेको उल्लेख गरे ।
यसै क्रममा उनले मजबुत राष्ट्रिय सुरक्षा प्रणाली, आधुनिक एवं बलियो सेना, सबल अर्थतन्त्र, चुस्त कूटनीतिले नै अन्तर्राष्ट्रिय मञ्चमा राष्ट्रको सामर्थ्य मापन हुने वस्तुवादी यथार्थताबारे नेपाल सरकार पूर्ण सचेत रहेको बताउँदै राष्ट्रिय सुरक्षाको मेरुदण्डको रूपमा रहेको नेपाली सेनाको समयानुकूल आधुनिकीकरण र सबलीकरणबारे सरकार गम्भीर रहेको बताए ।
नेपाली सेनाको समग्र क्षमता अभिवृद्धि तथा संगठनात्मक सुदृढीकरणमा रक्षा मन्त्रालयले सदैव सकारात्मक भूमिका निर्वाह गर्ने उनले बताए ।
कार्यक्रमको आरम्भमा बलाधिकृत रथी अशोकराज सिग्देलले स्वागत मन्तव्य व्यक्त गरेका थिए । त्यस अवसरमा रक्षा सचिव किरणराज शर्मा, रथीवृन्दका साथै रक्षा मन्त्रालय र नेपाली सेनाका अधिकृतहरूको उपस्थिति थियो ।
