काठमाण्डु–पाकिस्तानका पूर्वप्रधानमन्त्री इमरान खानकी पत्नी बुशरा बिबीले इद्दत मुद्दामा आफ्नो सजाय स्थगन गर्न माग गर्दै इस्लामाबाद उच्च अदालतमा निवेदन दिएकी छिन् ।

हाल जेल सजाय विताइरहेकी बुशराले आफ्ना वकिल सलमान सफदरमार्फत निवेदन दर्ता गराएकी हुन् ।

बुशराका पूर्वपति खवर मेनकाले उनीहरूको विवाहको विरोधमा अदालतमा निवेदन दिएपछि भएको सुनुवाइको फैसला सुनाउँदै गत फब्रुअरीमा इमरान खान र बुशरालाई सात वर्षको जेल सजाय सुनाइएको थियो ।

५१ पृष्ठ लामो फैसलामा न्यायाधीशले उनीहरूको विवाहले बेइमानी झल्काएको र प्रत्येकलाई पाँच लाख पाकिस्तानी रुपैयाँ जरिवाना पनि तोकेको छ । अदालतको फैसलापछि खान दम्पतीले जिल्ला अदालत तथा आपराधिक मुद्दाहरू हेर्ने विशेष अदालतमा आफ्नो सजायविरुद्ध याचिका दायर गरेका थिए । तर, मेनकाले सुनुवाइका लागि तोकिएका न्यायाधीश शाहरुख आरजुमान्डमाथि अविश्वास प्रकट गरेपछि यो मुद्दा अतिरिक्त जिल्ला अदालत र पुनरावेदन अदालतका न्यायाधीश मोहम्मद अफजल माजुकालाई हस्तान्तरण गरिएको थियो ।

पाकिस्तान तेहरीक–ए–इन्साफ (पीटीआई)ले यस विकासको आलोचना गर्दै यसलाई ‘न्यायको प्रावधानमा जानाजानी विलम्ब’ गरिएको बताएको छ ।

पीटीआईको विशेष समितिले पूर्वप्रधानमन्त्री खान र उनकी पत्नी बुशरा तत्काल जेलबाट रिहा गर्न योग्य रहेको बताएको छ ।