काठमाण्डु – एसियाली खेलकुद अन्तर्गत पुरुष क्रिकेटको फाइनल खेलमा शनिबार दुई परम्परागत प्रतिद्वन्द्वी भारत र पाकिस्तान आमने-सामने हुँदैछन्।

नेपाली समय अनुसार बिहान १०ः३० बजेदेखि सुरु हुने यस खेलसँगै दुई टोलीबीचको ह्यान्डशेक (हात मिलाउने) विवाद पुनः सतहमा आएको छ।

​खेलअघि सबैभन्दा ठूलो चासोको विषय दुवै टोलीका खेलाडीहरूबीचको हात मिलाउने प्रक्रिया (ह्यान्डशेक) लाई लिएर छ।
भारतीय पुरुष तथा महिला क्रिकेट टोलीले विगत ३८३ दिन र लगातार ६ वटा खेलदेखि पाकिस्तानी खेलाडीहरूसँग हात मिलाएका छैनन्।

​यो निर्णय गत वर्ष अप्रिलमा भएको पहलगाम आक्रमणपछि लिइएको थियो। भारतले सेप्टेम्बर २०२५ मा भएको पुरुष एसिया कपदेखि पाकिस्तानी खेलाडीहरूसँग हात नमिलाउने नीति अपनाउँदै आएको छ।

​टी–२० मा भारतको वर्चस्व

​विगतका खेलहरूको तथ्याङ्क हेर्दा भारतको पल्ला भारी देखिन्छ। दुई देशबीच हालसम्म खेलिएका १७ वटा टी(२० खेलमध्ये भारतले १३ खेल जितेको छ भने पाकिस्तानले ३ खेलमा मात्र सफलता पाएको छ। एक खेल टाइ भएको थियो।

पाकिस्तानले भारतलाई पछिल्लो पटक सन् २०२२ को एसिया कपमा पराजित गरेको थियो, त्यसयताका लगातार ६ टी–२० म्याचमा भारत नै विजयी भएको छ।

​टोलीको स्थिति

​भारतीय टोली : सेमिफाइनलमा श्रीलंकालाई हराउन १५ वर्षीय युवा ब्याटर वैभव सूर्यवंशी (३८ रन) र इशान किशन (अविजित ८० रन)ले उत्कृष्ट प्रदर्शन गरेका थिए।

बलिङतर्फ अनुभवी तीव्र गतिका बलर जसप्रित बुमराहका साथै स्पिनरद्वय अभिषेक शर्मा र अक्षर पटेल टोलीका प्रमुख हतियार हुन्।

​पाकिस्तानी टोली : कप्तान साहिबजादा फरहान भारतविरुद्ध टी–२० मा सबैभन्दा बढी छक्का प्रहार गर्ने ब्याटर हुन्।
उनीबाहेक मध्यक्रमका ब्याटर अब्दुल समद र सेमिफाइनलमा ३ विकेट लिएका बलर सुफियान मुकिमबाट पाकिस्तानले ठूलो आशा राखेको छ।

​

मौसम र पिच

​जापानको निसिनमा शनिवार मौसम सफा रहने र वर्षाको सम्भावना १० प्रतिशत मात्र रहेको बताइएको छ।
सेमिफाइनल खेलमा जस्तै पिचबाट स्पिन र बाउन्स मिल्ने सम्भावना रहेकाले बलरहरू निर्णायक बन्न सक्ने अनुमान गरिएको छ।

​सम्भावित प्लेइङ-११

​भारत : श्रेयस अय्यर (कप्तान), वैभव सूर्यवंशी, अभिषेक शर्मा, सञ्जु स्याम्सन (विकेटकिपर), इशान किशन, तिलक वर्मा, शिवम दुबे, अक्षर पटेल, वाशिंगटन सुन्दर, रवि बिश्नोई, जसप्रित बुमराह।​

पाकिस्तान : साहिबजादा फरहान (कप्तान), माज सदाकत, उस्मान खान (विकेटकिपर), सैम अयुब, हसन नवाज, अब्दुल समद, अराफात मिन्हास, अहमद दानियाल, मोहम्मद वसीम, सुफियान मुकिम, अबरार अहमद।