राप्रपामा कमल थापाले मागे कार्यकारी अध्यक्ष
काठमाण्डु – राष्ट्रिय प्रजातन्त्र पार्टी (राप्रपा)का अध्यक्ष कमल थापाले कार्यकारी अध्यक्ष दिनुपर्ने माग राखेका छन् । अध्यक्षद्वय पशुपती शमशेर जबरा र डा. प्रकाशचन्द्र लोहनीसँग थापाले आफूलाई कार्यकारी अध्यक्ष दिनुपर्ने माग राखेका हुन् । पार्टी एकताका बाँकी काम थाँती रहेको अवस्थामा थापाले पार्टीभित्र छुट्टै स्थान खोजेका हुन् ।
स्रोतकाअनुसार थापाको उक्त प्रस्ताव दुवै अध्यक्षले अस्वीकार गरेका छन् । दुवै अध्यक्षले पार्टी एकताको काम टुंगोमा पुर्याउनुपर्ने बेला थापाको उक्त प्रस्तावमाथि आशंका व्यक्त गरेका छन् । महाधिवेशनसम्म तीन अध्यक्षको हैसियत बराबर रहनेगरी पार्टीलाई नेतृत्व गर्नुपर्ने राणा र लोहनीको धारणा छ ।
‘पार्टी एकता लगायतका बाँकी काम टुंगो लाग्न नसकेको अवस्थामा कमल थापाले पार्टीभित्र कार्यकारीको भूमिका माग्नु भएको छ । यो भनेको काम कुरो एकातिर कुम्लो बोकी.. जस्तै हो’, राप्रपा निकट स्रोतले भन्यो , ‘दुवै अध्यक्षज्यूहरुले उहाँको प्रस्तावमा हामी सहमत छैनौं र यो हुँदा पनि हुँदैन भनेर जवाफ दिनुभएको छ ।’
त्यस्तै चुनाव चिन्हका कारण पनि राप्रपा निर्वाचन आयोगमा दर्ता हुन सकेको छैन् । कमल थापा समूहको राप्रपाले चुनाव चिन्ह गाई राख्नुपर्ने अडान लिएको छ भने अध्यक्षद्वय राणा र लोहनीले हलो चुनाव चिन्ह राख्नुपर्ने बताउँदै आएका छन् ।
‘कमल थापाको राप्रपाले अहिले पार्टी दर्ता गरौं । एकता भएको ६ महिनाभित्र चुनाव चिन्हबारे उपर्युक्त समय निर्णय गरौं भन्ने छ । तर, साउन २५ गते ६ महिना पुग्छ’, स्रोतले भन्यो, ‘राप्रपा संयुक्तले चुनाव चिन्हसहित आयोगमा दर्ता गरौं भन्ने छ ।’
राप्रपाको गाईलाई राप्रपाको झण्डाको रुपमा राप्रपा संयुक्तले स्वीकार गरिसकेको छ । त्यसकराण त्यसलाई झण्डाको रुपमा स्वीकार गरेपछि निर्वाचन चिन्ह हलो हुनुपर्ने राप्रपा संयुक्तको माग छ । त्यस्तै राप्रपाको अन्तरिम विधान भनेर राप्रपा संयुक्त स्वीकार गरिसकेको एक नेताले बताए ।
‘राप्रपासँग राप्रपा संयुक्त विलिन भएको होइन । पार्टी एकता गरेको हो । एकीकरणको सन्र्दभमा विश्वमा दुवै पार्टीको अस्तित्व रहने प्रक्रिया छ’, ती नेताले भने, ‘हामीले राप्रपाको चुनाव चिन्ह हलो हुनुपर्छ भनेर अडान लिएको छौं हामी पछि हट्ने अवस्था छैन् ।’
