टोखाबाट अपहरणमा परेका साहको केही घण्टामै सकुशल उद्धार, लोकन्थलीबाट ७ जना पक्राउ
काठमाण्डु – प्रहरीले शुक्रबार बिहान अपहरणमा परेका एक ब्यक्तिलाई सकुशल उद्धार गरेको छ ।
काठमाण्डुको टोखाबाट आज बिहान १० बजे अपहरणमा परेका रामबाबु शाहलाई महानगरीय अपराध महाशाखाको टोलीले भक्तपुरको लोकन्थलीबाट दिउँसो १ बजे सकुशल उद्धार गरेको हो ।
आफ्ना बाबुलाई चार–पाँच जनाको समूहले अपहरण गरेको र २५ लाख फिरौती रकम मागेपछि साहका छाेराले प्रहरीलाई खबर गरेका थिए । साहलाई बन्धक बनाइएको कोठाबाट साहसहित केही घण्टामै प्रहरीले सात जनालाई पक्राउ गरेको छ ।
प्रहरीको प्रारम्भिक अनुसन्धानबाट उनीहरूबीच जग्गा कारोबारको विषयमा कुरा नमिलेपछि अपहरण गरेको बुझिएको छ । महाशाखाका एसपी होविन्द्र बोगटीका अनुसार उनीहरूबाट कुनै हतियार फेला परेको छैन । यस विषयमा थप अनुसन्धान भइरहेको एसपी बोगटीले जानकारी दिए ।