काठमाण्डु– दक्षिण कोरियाका विदेशमन्त्री चो ह्युन नेपाल आइपुगेका छन् । उनी तीनदिने औपचारिक भ्रमणका क्रममा शनिबार अपराह्न नेपाल आइपुगेका हुन् ।

भोटेकोसी नदीमा आएको बाढीपछि बेपत्ता भएका आफ्ना नागरिकको खोज तथा अन्यको उद्धारमा नेपालसँग सहकार्य र सहयोगका विषयमा छलफल गर्न दक्षिण कोरियाली विदेशमन्त्री चो नेपाल आएका हुन् ।

उनले आफ्ना नेपाली समकक्षी शिशिर खनालसँग भेटवार्ता गरी भदौ १० गते भोटेकोशी नदीमा आएको विनाशकारी बाढीपछि जारी खोज तथा उद्धार प्रयासमा दक्षिण कोरियाले गर्न सक्ने सहयोगबारे छलफल गर्ने कार्यक्रम रहेको छ ।

तीनदिने नेपाल भ्रमणका क्रममा सोमबारसम्म चोले नेपाली विदेशमन्त्री खनालसँग वार्ता गर्ने तथा बेपत्ता भएका कोरियाली नागरिकका परिवारसँग भेट गर्नेछन् ।

बाढीमा रसुवा जिल्लामा कार्यरत ९ जना दक्षिण कोरियाली नागरिक बेपत्ता छन् । उनीहरूमध्ये डुसान एनर्बिलिटीका ६ जना र कोरिया साउथ–इस्ट पावरका ३ जना छन् । उनीहरू सबै जलविद्युत् आयोजना निर्माणस्थलमा काम गरिरहेका थिए ।

यसैगरी, चोले विपद् प्रभावित क्षेत्रमा खटिएको कोरिया डिजास्टर रिलिफ टिम (केडीआरटी) लाई हौसला प्रदान गर्ने तथा आफ्नै स्तरमा खोजी कार्य गरिरहेका सम्बन्धित कम्पनीका प्रतिनिधिहरूसँग घटनास्थलमै पुगेर हौसला दिने दिनेछन् ।

कोरियाली टोलीले नेपाली सुरक्षाकर्मी तथा सम्बन्धित कम्पनीका उद्धार टोलीसँग सहकार्य गर्दै हेलिकोप्टर, ड्रोन, खोजी कुकुर, थर्मल इमेजिङसहितका अत्याधुनिक उपकरण प्रयोग गरेर बाढीमा हराइरहेका खोजी गरिरहेको छ।