प्रधानमन्त्री ओलीको शपथ पुनः गर्ने कि नगर्ने ? मंगलबार टुंगो लाग्ने
काठमाण्डु – प्रधानमन्त्री केपी शर्मा ओलीविरुद्ध सर्वोच्च अदालतमा दायर भएको रिट दर्ता भएको छ ।
गत शुक्रबार राष्ट्रपति विद्यादेवी भण्डारीले प्रधानमन्त्री ओलीलाई गराएको शपथ ग्रहणविरुद्ध सर्वोच्चमा आइतबार नै दायर भएको रिट सोमबार दर्ता भएको हो ।
उक्त रिटमाथिको सुनुवाई मंगलबार हुनेछ । प्रधानमन्त्री ओलीले पुनः शपथ लिनुपर्ने वा नपर्ने भन्ने विषयको टुंगो भोली लाग्नेछ ।
राष्ट्रपति भण्डारीले ‘यो प्रतिज्ञा गर्छु कि’ भन्ने वाक्य उच्चारण गर्न पटक–पटक दोहोर्याउँदा प्रधानमन्त्री ओलीले ‘त्यो पर्दैन’ भन्ने जवाफ दिएका थिए ।
उनले ‘मुलुक र जनताप्रति पूर्ण बफादार रही सत्य निष्ठापूर्वक यो प्रतिज्ञा गर्छु कि’ र ‘ईश्वर’ भन्ने शब्द छुटाएका थिए ।
अधिवक्ता चन्द्रकान्त ज्ञवाली, अधिवक्ताहरु लोकेन्द्र ओली र सन्तोष भण्डारीले प्रधानमन्त्रीको शपथ बदर गर्न माग गर्दै सर्वोच्चमा रिट दर्ता भएको हो ।
त्यस्तै सांसद रहेका सात जना मन्त्रीको विषय पनि सर्वोच्च पुगेको छ । सांसद पदमा नरहेका व्यक्तिलाई मन्त्रीमा नियुक्त गरेको भन्दै अधिवक्ता ज्ञवाली, अधिवक्ताहरु ओली र भण्डारीले बदर गर्न माग गरेका छन् ।
माओवादी केन्द्र परित्याग गरे नेकपा एमालेमा प्रवेश गरेका रामबहादुर थापा बादल, टोपबहादुर रायमाझी, लेखराज भट्ट, प्रभु शाह, गौरीशंकर चौधरी र दावा तामाङलाई मन्त्री बनाएको भन्दै सर्वोच्चमा रिट दायर भएको छ ।
