काठमाण्डु- नेकपा (एमाले) का अध्यक्ष केपी शर्मा ओलीले नेपाली समाजमा ‘नक्कली भगवान्’ जन्मिने प्रवृत्ति बढेको भन्दै व्यङ्ग्य गरेका छन्।

उनले विदेशी जोगी र साधुलाई बढी सम्मान गर्ने तर आफ्नै देशका विद्वान् र उनीहरूले लेखेका ग्रन्थलाई महत्त्व नदिने प्रवृत्तिमाथि पनि प्रश्न उठाएका छन्।

मंगलबार काठमाडौंमा आयोजित मदन भण्डारी स्मृति प्रतिष्ठान नेपालको स्मारिका लोकार्पण कार्यक्रममा सम्बोधन गर्दै ओलीले देवताहरूको जन्मसम्बन्धी पौराणिक प्रसंग उल्लेख गरेर यस्तो टिप्पणी गरेका हुन्।

उनले २२–२३ सय वर्षअघिसम्म देवताहरूको जन्म धेरै हुने गरेको र पार्वतीको श्रापपछि देवता जन्मिन छाडेको प्रसंग सुनाए।

‘यो २२–२३ सय वर्ष अगाडि मात्रै आइपुग्दा भगवान्हरू छ्यास्छ्यास्ती जन्मिँदा जन्मिँदा ३३ कोटि जन्मिए। धन्न पार्वतीले सराप दिइछन् र त्यसपछि देवता जन्मन पाएनन्। तर अहिले नक्कली भगवान् जन्मिएर हैरान छ’, ओलीले भने।

उनको यो टिप्पणी धार्मिक आस्था र भगवान्का नाममा समाजमा देखिने प्रवृत्तिप्रति लक्षित व्यङ्ग्यका रूपमा आएको हो।

विदेशी जोगीलाई सम्मान, आफ्नै विद्वान् ओझेलमा

ओलीले नेपाली समाजमा विदेशी जोगी तथा साधुलाई सहजै सम्मान गर्ने तर आफ्नै देशका विद्वान् र बौद्धिक व्यक्तित्वलाई पर्याप्त रूपमा नचिन्ने प्रवृत्ति रहेको बताए।

‘आफ्ना कहाँका विद्वान् चाहिँ हामी त्यति चिन्दैनौँ। सम्भवतः तपाईंहरूले आफ्ना ग्रन्थहरूमा नेपालीले लेखेका कुराहरूको उद्धरण कमै गर्नुभएको होला, विदेशीकै उद्धरण गर्नुभएको होला’, उनले भने।

नेपाली विद्वान्ले लेखेका पुस्तक, अनुसन्धान र विचारलाई अध्ययन तथा उद्धरण गर्ने अभ्यास कमजोर रहेको उनको भनाइ थियो। विदेशी लेखक र विचारकका भनाइलाई प्राथमिकता दिने तर स्वदेशी ज्ञान र बौद्धिक योगदानलाई बेवास्ता गर्ने प्रवृत्तिप्रति उनले असन्तुष्टि व्यक्त गरे।

ओलीको भनाइले नेपाली ज्ञान परम्परा, मौलिक लेखन र स्वदेशी विद्वान्को योगदानलाई अध्ययन तथा सार्वजनिक बहसमा उचित स्थान दिनुपर्ने विषयलाई उठाएको छ।

मदन भण्डारी स्मृति प्रतिष्ठान नेपालको स्मारिका लोकार्पण कार्यक्रममा ओलीले धार्मिक तथा सांस्कृतिक प्रसंगसँगै नेपाली समाजको बौद्धिक अभ्यासबारे आफ्नो धारणा राखेका हुन्।

कार्यक्रममा उनले ‘नक्कली भगवान्’ को प्रसंग उठाउँदै समाजमा भगवान् वा आध्यात्मिक व्यक्तित्वका नाममा देखिने प्रवृत्तिमाथि व्यङ्ग्य गरे। साथै, नेपाली विद्वान्का रचनालाई आफ्नै अध्ययन र लेखनमा समेट्नुपर्ने सन्देश पनि दिए।