पहिरोका कारण नारायणगढ- मुग्लिन सडक अवरुद्ध
चितवन – नारायणगढ– मुग्लिन सडकखण्डको ठाउंठाउंमा पहिरो खसेपछि सडक अवरुद्ध भएको छ । जिल्ला प्रहरी कार्यालय चितवनका अनुसार भरतपुर महानगरपालिका–२९ घुमाउनेमा मंगलबार बिहान ५ बजे ठूलो पहिरो खसेको छ ।
थप पहिरो नखसेमा पहिरो पन्छाउन तीनदेखि चार घण्टा लाग्ने प्रहरीले जनाएको छ । त्यसैगरी सोही सडकको टोपे खोला र जलवीरेमा पनि साना पहिरो खसेका छन् । यसअघि सोमबार राति ११ः४० बजे गाईघाटमा खसेको पहिरो मंगलबार बिहान १ः३० बजे पन्छाएर एकतर्फी सवारी सञ्चालनमा ल्याइएको थियो ।
सोमबार दिउंसोदेखि निरन्तर वर्षा भइरहेकाले सो सडकका जुनसुकै ठाउंमा पहिरो खस्न सक्ने भन्दै उच्च सतर्कता अपनाउन प्रहरीले आग्रह गरेको छ । विस्तारका क्रममा सडकका धेरै ठाउँमा भित्तो काटिएपछि पानी परेसंगै ठाउंठाउंमा पहिरो खसेका हुन् ।
