काठमाण्डु- लियोनेल मेस्सीले अर्जेन्टिनाको राष्ट्रिय टोलीबाट बिदाइ लिएसँगै विश्व फुटबलकै सबैभन्दा चर्चित १० नम्बर जर्सी पनि अब नयाँ खेलाडीको प्रतीक्षामा छ।
३९ वर्षीय मेस्सीले अर्जेन्टिनाका लागि आफ्नो अन्तिम अन्तर्राष्ट्रिय खेल खेलिसकेका छन्। उनी यसअघि पनि सन् २०१६ मा राष्ट्रिय टोलीबाट संन्यासको घोषणा गरेर फर्किएका थिए। यसपटक भने उनको अन्तर्राष्ट्रिय यात्रा अन्त्य भएको मानिएको छ।
मेस्सीको बिदाइसँगै अर्जेन्टिनाको १० नम्बर जर्सीलाई पनि स्थायी रूपमा अवकाश दिने चर्चा चलेको थियो।
अर्जेन्टिना फुटबल संघका अध्यक्ष क्लाउडियो तापियाले यसअघि मेस्सीले व्यावसायिक फुटबलबाट बिदाइ लिएपछि १० नम्बर जर्सी पनि अवकाश दिने संकेत गरेका थिए।
तर अन्तर्राष्ट्रिय फुटबलमा जर्सी नम्बर स्थायी रूपमा हटाउने विषयमा फिफाको नियम बाधक देखिएको छ।
फिफाको नियमअनुसार प्रतियोगितामा सहभागी राष्ट्रिय टोलीले खेलाडीलाई निश्चित क्रमअनुसार जर्सी नम्बर प्रदान गर्नुपर्ने हुन्छ।
२०२६ को विश्वकपमा पनि राष्ट्रिय टोलीले १ देखि २६ सम्मका नम्बर प्रयोग गर्नुपर्ने व्यवस्था थियो। त्यसैले अर्जेन्टिनाले १० नम्बर जर्सीलाई स्थायी रूपमा हटाउन सहज छैन।
१० नम्बर कसले लगाउला?
मेस्सीपछि अर्जेन्टिनाको १० नम्बर जर्सी कसले लगाउने भन्ने प्रश्न पनि उठेको छ।
प्रारम्भिक चर्चामा इटालियन क्लब कोमोबाट खेलिरहेका निको पाजको नाम अगाडि आएको छ। २२ वर्षीय पाजलाई अर्जेन्टिनाको भविष्यका महत्वपूर्ण खेलाडीका रूपमा हेरिएको छ।
पाज स्पेनमा जन्मिएका हुन् । उनले रियल मड्रिडको युवा प्रणालीबाट फुटबल विकास गरेका थिए। अर्जेन्टिनाको राष्ट्रिय टोलीमा उनले अझै ठूलो प्रभाव छाड्न बाँकी रहे पनि आगामी दिनमा उनको भूमिका महत्वपूर्ण हुन सक्ने अपेक्षा गरिएको छ।
तर मेस्सीको स्थान लिनु केवल जर्सी नम्बर पाउनुजस्तो सहज विषय भने होइन। अर्जेन्टिनाका लागि १० नम्बर जर्सी मेस्सीअघि पनि डिएगो म्याराडोना जस्ता महान् खेलाडीको पहिचान थियो। मेस्सीले त्यसलाई आफ्नै युगको प्रतीक बनाए।
म्याराडोनापछि मेस्सी, अब कसको पालो?
अर्जेन्टिनाको १० नम्बर जर्सी फुटबलको एउटा नम्बर मात्र होइन, देशको फुटबल इतिहाससँग जोडिएको भावनात्मक प्रतीक हो।
म्याराडोनाले लगाएको यही नम्बर मेस्सीले सम्हालेपछि अर्जेन्टिनाले अर्को पुस्ताको महान् खेलाडी पाएको थियो। मेस्सीले विश्वकप, कोपा अमेरिका र अन्य ठूला प्रतियोगितामा अर्जेन्टिनालाई सफलता दिलाउँदै १० नम्बरलाई आफ्नो नामसँग अभिन्न रूपमा जोडिदिए।
अब मेस्सी राष्ट्रिय टोलीमा नहुने भएपछि अर्जेन्टिनाले नयाँ युग सुरु गर्नुपर्नेछ। मैदानमा उनको नेतृत्व, गोल, सिर्जनात्मकता र उपस्थितिको अभाव हरेक खेलमा महसुस हुने निश्चित छ।
मेस्सीको अन्तर्राष्ट्रिय यात्रा भने सुखद र दुःखद दुवै क्षणले भरिएको थियो। २०१४ को विश्वकप फाइनलमा जर्मनीसँगको हारदेखि २०१५ र २०१६ को कोपा अमेरिकामा निराशासम्म उनले लामो संघर्ष गरे।
एक समय राष्ट्रिय टोलीबाटै टाढिने निर्णय गरेका मेस्सी अन्ततः अर्जेन्टिनाका लागि कोपा अमेरिका र विश्वकप जित्दै महान् अध्याय पूरा गर्न सफल भए।
अब त्यो अध्याय बन्द भएको छ।
१० नम्बर जर्सी भने बाँकी छ।
र, अर्जेन्टिनाको नयाँ पुस्ताले त्यस जर्सीमा मेस्सीको छायाबाट बाहिर निस्केर आफ्नै इतिहास लेख्नुपर्नेछ।
प्रतिक्रिया