एजेन्सी– यस वर्ष अर्थशास्त्रतर्फको नोबेल पुरस्कार अमेरिकी अर्थशास्त्री रोबर्ट ई. हल र माइकल उडफोर्डलाई संयुक्त रूपमा प्रदान गरिएको छ।

रोयल स्वीडिस एकेडेमी अफ साइन्सेसले ‘समष्टिगत आर्थिक स्थिरीकरणका व्यष्टिगत आर्थिक आधार’ सम्बन्धी अनुसन्धान तथा विकासमा महत्वपूर्ण योगदान पुर्‍याएको भन्दै हल र उडफोर्डलाई यस वर्षको अर्थशास्त्रतर्फको नोबेल पुरस्कार प्रदान गरेको हो।

पुरस्कार समितिका अनुसार हल र उडफोर्डले विकास गरेका नयाँ समष्टिगत आर्थिक (म्याक्रोइकोनोमिक) मोडलहरूले अर्थतन्त्रमा हुने उतारचढावलाई बुझ्न र प्रभावकारी स्थिरीकरण नीति निर्माण गर्न महत्वपूर्ण आधार प्रदान गरेका छन्।

यसअघि नै सम्भावित विजेतामध्ये उडफोर्डको नाम पनि चर्चामा थियो। उनी आधुनिक ‘फरवार्ड गाइडन्स’ अर्थात् मौद्रिक नीतिसम्बन्धी भविष्यको संकेत दिने अवधारणाका प्रमुख विकासकर्तामध्ये एक हुन्।

समितिले समयमै अपनाइने वित्तीय तथा मौद्रिक नीतिले अर्थतन्त्रमा आउने तीव्र उतारचढावलाई कम गर्न सक्ने उल्लेख गरेको छ। उनीहरूको अनुसन्धानले आर्थिक स्थायित्व कायम गर्न सरकार तथा केन्द्रीय बैंकले प्रभावकारी नीति निर्माण गर्न सक्ने क्षमतामा महत्वपूर्ण सुधार ल्याएको समितिको भनाइ छ।

स्वेरिजेस रिक्सबैंक प्राइज इन इकोनोमिक साइन्सेस इन मेमोरी अफ अल्फ्रेड नोबेल अन्तर्गत प्रदान गरिने यो पुरस्कारको राशि १ करोड २० लाख स्विडिस क्रोनर (करिब ९ लाख पाउन्ड) रहेको छ।