प्रधानमन्त्री ओली मोदीको सपथमा

एजेन्सी – बिम्स्टेक सदस्य मुलुकका राष्ट्ररसरकार प्रमुखलाई साक्षी राख्दै भारतका प्रधानमन्त्री नरेन्द्र मोदीले दोस्रोपटक प्रधानमन्त्री पदको शपथ खाएका छन्। शपथमा बिम्स्टेक सदस्यका नाताले प्रधानमन्त्री केपी शर्मा ओली पनि सहभागी भएका छन् । उनी बिहीबार (आज) दिउंसो दिल्ली प्रस्थान गरेका थिए । अघिल्लो पटक उनले सार्कका राष्ट्र एवं सरकार प्रमुखलाई साक्षी राखेका थिए। त्यतिबेला तत्कालीन प्रधानमन्त्री सुशील कोइराला सहभागी भएका थिए।

राष्ट्रपति भवनको फोरकोर्टको खुलामैदानमा भव्य समारोहबीच मोदीले बिहीबार साँझ राष्ट्रपति रामनाथ कोविन्दबाट प्रधानमन्त्री पदको शपथ लिएका हुन्। गैरकांग्रेसी प्रधानमन्त्रीका रूपमा दोस्रो कार्यकालको शपथ लिने उनी पहिलो भारतीय प्रधानमन्त्री हुन्।

समारोहमा प्रधानमन्त्री ओलीले मोदीलाई बधाई तथा सफल कार्यकालको शुभकामना दिए। प्रधानमन्त्री ओली र मोदीबीचमा शुभकामनाका क्रममा समेत संक्षिप्त कुराकानी भएको थियो।उत्सवका रूपमा आयोजित समारोहबाटै मोदी क्याबिनेटका सहभागी मन्त्रीलाई पनि शपथ ग्रहण गराइएको छ।

प्रधानमन्त्री ओलीले मन्त्रीगणलाई पनि शुभकामना गर्दै सघन सहकार्यका लागि नेपाल सधैँ तत्पर रहेको बताएका थिए। विकासका लागि अग्रसर नेपालका लागि छिमेकका साथ र सहकार्य रहने भन्दै उनले सहकार्य गर्न तयार रहेको बताए।

संक्षिप्त छलफलमा बिम्स्टेक सदस्यका अन्य राष्ट्र र सरकार प्रमुखसँग पनि सामान्य कुराकानी गरेका थिए। प्रधानमन्त्री ओलीले राष्ट्रपति कोविन्दासँग पनि संक्षिप्त छलफल गर्दै सहकार्य र सम्वन्धको विषय उठाउन पाए। कोविन्दाले नेपालको विकासको लागि भारत सहयोगी भावका साथ अघि बढ्ने बताए।

भारतीय प्रधानमन्त्री मोदीले छिमेकलाई साथ लिएर जाने सुनाएको र त्यही आधारमा सम्वन्ध अघि बढ्ने बताए। नेपाल र भारतको सम्बन्ध परापुर्व कालकोमात्र नभै साह्रै युनिक रहेको भन्दै यसलाई उदाहरणिय बनाउन पर्ने बताएको जानकारी अधिकारीहरुले दिए। आफ्नो छोटो निमन्त्रणा स्वीकार गरेर शपथको शोभा बढाएको भन्दै मोदीले सबैलाई धन्यवाद दिएका छन्।