काठमाण्डु – राष्ट्रपति रामचन्द्र पौडेलले जलवायु परिवर्तन आजको विश्वको प्रमुख चिन्ताको विषय भएकाले समस्या समाधानका लागि सबै मिलेर काम गर्नुपर्ने बताएका छन् ।
राष्ट्रपति पौडेल र बेलायतका राजकुमार एडवार्डबीच मंगलबार राष्ट्रपति भवन शीतल निवासमा भएको शीष्टाचार भेटमा उनले भने, ‘जलवायु परिवर्तन आज विश्वको प्रमुख चिन्ताको विषय बनेको छ, जलवायु परिवर्तनको प्रत्यक्ष मारमा परेको नेपालले विभिन्न अन्तर्राष्ट्रिय मञ्चहरूमा हिमाल संरक्षणको विषयलाई प्रमुखताका साथ आवाज उठाउँदै आएको छ ।’
राष्ट्रपति पौडेलका प्रेस सल्लाहकार किरण पोखरेलले यसै सन्दर्भमा नेपालले सगरमाथा संवादको थालनी गर्न लागेको राष्ट्रपति पौडेलले जानकारी दिएका बताए । मञ्चको पहिलो संस्करण आगामी १६–१८ मेसम्म काठमाण्डुमा ‘जलवायु परिवर्तन, हिमाल र मानवको भविष्य’ विषयमा आयोजना हुन गइरहेको उनको भनाइ थियो ।
राष्ट्रपति पौडेलले बेलायतका राजपरिवारका सदस्यबाट विभिन्न समयमा हुँदैआएका नेपाल भ्रमणले २ देशबीच रहिआएको सुमधुर सम्बन्धलाई अझ मजबुत पार्न योगदान दिएको बताए । उनले महारानी एलिजाबेथ द्वितीय र राजकुमार फिलिपबाट सन् १९६० र १९८६ मा नेपालको राजकीय भ्रमण भएको स्मरण गरे ।
‘नेपाल र बेलायतबीच सदियौंदेखि घनिष्ट सम्बन्ध रहिआएको छ, महत्त्वपूर्ण विकास साझेदार समेत रहेको बेलायतले नेपालको चौतर्फी विकासमा सहयोग पुर्याउँदै आएकोमा धन्यवाद व्यक्त गर्दछु,’ राष्ट्रपति पौडेलले भने । सो अवसरमा उनले नेपाली नागरिक र आफ्ना तर्फबाट राजा चाल्र्सको व्यक्तिगत सुख एवं सुस्वास्थ्यको शुभकामना व्यक्त गरे ।
नेपाल भ्रमणका लागि बेलायतका राजकुमार एडवार्ड धर्मपत्नी सोफीयासहित मंगलबारै काठमाण्डु आएका हुन् । शिष्टाचार भेटमा बेलायतका राजकुमारका धर्मपत्नी सोफीया, नेपालका लागि बेलायती राजदूत सहभागी थिए ।
सो अवसरमा राजकुमार एडवार्डले नेपालमा जलवायु परिवर्तनले पारेको असर र त्यसको न्युनीकरणमा नेपालले गरेको प्रयासबारे भ्रमणका क्रममा जानकारी हुने विश्वास व्यक्त गरे । उनले भ्रमणका क्रममा प्रकृति कति जोखिम अवस्थामा छ र हिमालमा जलवायु परिवतर्नले कस्तो असर पारेको छ भनेर जान्न–बुझ्न पाउने पनि बताए ।
बेलायतको राजपरिवारका सदस्यबाट नेपाल आउने प्रयास भइरहेको र नेपाल आउँदा आपूmलाई अत्यन्त खुशी लागेको बताउँदै राजकुमारले नेपाल बेलायतबीच भविष्यमा सहयोगको आदानप्रदान गर्दा युवा र महिला सशक्तीकरणको विषय सान्दर्भिक हुने बताए । उनले ब्रिटिश सेनामा नेपालले भर्तीका लागि दिएको स्वीकृतिका लागि आभार प्रकट गर्दै नेपाल बेलायतबीचको सुमधुर सम्बन्धमा ब्रिटिश गोर्खा सेना कोशेढुंगा रहेको उल्लेख गरे ।
राष्ट्रपति रामचन्द्र पौडेलसमक्ष बेलायती सेनाको गोर्खा–ब्रिगेडका प्रमुख मेजर–जनरल जेराल्ड स्ट्रिकल्याण्डले ‘ब्रिगेड अफ गोर्खा’को सन् २०२४ को वार्षिक प्रतिवेदन पेश गरेका छन् ।
राष्ट्रपति पौडेलले प्रतिवेदन प्रस्तुत गरेकोमा बेलायत सरकारप्रति आभार प्रकट गर्दै ‘ब्रिटिश–गोर्खा’ हाम्रो द्विपक्षीय सम्बन्धको महत्त्वपूर्ण कडी भएको बताए । ‘ब्रिटिश–गोर्खा हाम्रो द्विपक्षीय सम्बन्धको महत्त्वपूर्ण कडी हो, जनस्तरको सम्बन्धलाई थप सुदृढ गर्न पनि यसले महत्त्वपूर्ण योगदान पुर्याएको छ,’ राष्ट्रपति पौडेलको भनाइ उदृत गर्दै उनका प्रेस सल्लाहकार पोखरेलले भने ।
पूर्वब्रिटिश गोर्खाका केही जायज गुनासा सम्बोधन गर्न गठन भएको ‘द्विपक्षीय संयन्त्र’मा सकारात्मक छलफल भइरहेको विश्वास पनि राष्ट्रपति पौडेलले व्यक्त गरेका छन् ।
प्रतिक्रिया