काठमाण्डु – नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले देशका वृद्धवृद्धाहरू, युवायुवतीहरू र बालबालिकाहरू एकचोटी फेरि माओवादीप्रति समर्पित हुने भाव पैदा भएको देखिएको बताएका छन् ।

‘जनतासँग माओवादी–मध्यपहाडी (पुष्पलाल) लोकमार्ग जनजागरण अभियान’ अन्तर्गत कास्की रानीपौवा, पोखरामा आयोजित जनसंवाद कार्यक्रमलाई सम्बोधन गर्दै उनले निकै ठूलो जिम्मेवारी माओवादीको काँधमा र एकचोटी फेरि प्रचण्डको काँधमा नयाँ क्रान्ति एवं अभिभारा दिन नेपाली जनता तयार भएको बताएका हुन् ।

उनले भने, ‘यो देशका वृद्धवृद्धाहरू, युवायुवती र बालबालिकाहरू पनि एकचोटी फेरि माओवादीप्रति समर्पित हुने भाव पैदा भएको देखिएको छ । देश माओवादीमय, स्वतन्त्रमय बन्दै गएको छ । हामी ०६४ जस्तै देश माओवादीमय हुने र प्रचण्डमय अवस्था देखिरहेको छु । निकै ठूलो जिम्मेवारी माओवादीको काँधमा वा प्रचण्डको काँधमा नयाँ क्रान्ति एवं अभिभारा दिन नेपाली जनता तयार भएको महसूस गरेको छु ।’

पार्टीले सञ्चालन गरेको ‘जनतासँग माओवादी मध्यपहाडी लोकमार्ग जागरण अभियान’ राष्ट्रिय एकताको अभियान बन्न पुगेको उनले दाबी गरे । उनले अभियानका क्रममा पार्टीका सबै शीर्ष नेताहरू सहभागी भएको र त्यस क्रममा जनता, व्यवसायी, कर्मचारी, बुद्धिजीवीहरू लगायतबाट प्राप्त सुझावलाई पार्टीले ग्रहण गरेको पनि बताए ।