रोल्पा – नेकपा एमालेका उपमहासचिव प्रदीप ज्ञवालीले १० वर्षे द्वन्द्वले के दियो भनेर समीक्षा गर्न रोल्पाली जनतालाई सुझाव दिएका छन् ।
एमाले रोल्पाको सातौं जिल्ला अधिवेशनको उद्घाटन गर्न लिबाङ पुगेका ज्ञवालीले १० वर्ष चलेको द्वन्द्वले विकास गर्यो कि विनाश गर्यो भन्दै गम्भीर समीक्षा गर्न रोल्पालीलाई सुझाव दिए ।
‘१० वर्षसम्म चलेको द्वन्द्वले क्रान्ति सफल गरेन,’ उपमहासचिव ज्ञवालीले भने, ‘जनताको अवस्था फेरिएन, नेताको मात्रै जीवन स्तर उकासियो ।’
क्रान्तिको सपना देखाएर जनतालाई ढाँटिएको भन्दै उनले रोल्पाली जनता भ्रममा पर्न नहुने बताए । सुन तस्करीको प्रसङ्ग कोट्याउँदै उपमहासचिव ज्ञवालीले द्वन्द्वबाट स्थापित भएका नेता र उनका छोराहरू सुन तस्करीमा जोडिनु रोल्पाका जनताको सपनामाथि कुठाराघात भएको टिप्पणी गरे ।
‘१० वर्ष द्वन्द्व के नेता र नेताका छोराले सुन तस्करीको लाइन मिलाउन थियो ?’ उनले भने, ‘द्वन्द्वले रोल्पालाई के दियो भन्दा सुनैसुनका घर दियो भनेर व्यंग्य गर्ने बेला आयो । यो बिडम्बना हो ।’
एमाले सचिव एवं लुम्बिनी प्रदेश इन्चार्ज पद्मा अर्यालले अहिलेको गठबन्धन विदेशीको इशारामा नभएको बताइन् । कांग्रेस–माओवादी गठबन्धनले मुलुक चौपट भएकाले देशको समृद्धिका लागि एमाले र माओवादीको गठबन्धन बनेको उनले बताइन् ।
केहीबेरमा सुरू हुने बन्द सत्रले एमाले रोल्पाको नयाँ जिल्ला कमिटी चयन गर्नेछ । अध्यक्षका लागि अमृत घर्ती, घनश्याम आचार्य, शान्तकुमार वली र रोशन वलीले दाबेदारी प्रस्तुत गरेका छन् ।
प्रतिक्रिया