नवनियुक्त मन्त्रीको शपथमा राजेन्द्र महतो अनुपस्थित


काठमाण्डु – राष्ट्रपति विद्यादेवी भण्डारीसमक्ष नवनियुक्त मन्त्रीहरुले आज पद तथा गोपनीयताको शपथ लिएका छन् ।

राष्ट्रपति भवन, शीतल निवासमा आज आयोजित समारोहमा शपथग्रहण कार्यक्रम सम्पन्न भएको हो । राष्ट्रपति भण्डारीले प्रधानमन्त्री केपी शर्मा ओलीका सिफारिसमा मौजुदा मन्त्रिपरिषद्मा आज नियुक्ति, हेरफेर र विस्तार गरी पूर्णता दिएकी हुन् ।

नेकपा (एमाले) र जनता समाजवादी पार्टी नेपालका नेतासहित मन्त्री र राज्यमन्त्री गरी थप आठ जनालाई सहभागी गराई २५ सदस्यीय मन्त्रिपरिषद् विस्तार गरिएको हो ।

यही जेठ ८ गते प्रतिनिधिसभाको विघटनपछि यो दोस्रो पटक मन्त्रिपरिषद्को विस्तार हो । पछिल्लो पटक गत वैशाख ३० गते ठूलो दलको नेताका हैसियतमा प्रधानमन्त्री भएका ओलीले वैशाख ३१ गते पहिलो र यही जेठ २१ गते दोस्रो पटक मन्त्रिपरिषद् विस्तार गरेका थिए ।

शपथ लिनेमा गृहमा खगराज अधिकारी, उद्योग, वाणिज्य तथा आपूर्तिमा राजकिशोर यादव, सञ्चार तथा सूचना प्रविधिमा नैनकला थापा, कृषि तथा पशुपन्छी विकासमा ज्वालाकुमारी साह, वन तथा वातावरणमा नारदमुनि राना, सङ्घीय मामिला तथा सामान्य प्रशासनमा गणेशकुमार पहाडी र प्रधानमन्त्री तथा मन्त्रिपरिषद्को कार्यालय हेर्ने गरी मोहन बानियाँ मन्त्री छन् ।
यसैगरी राष्ट्रपति भण्डारीका उपस्थितिमा प्रधानमन्त्री ओलीले आशाकुमारी विकलाई वन मन्त्रालयको राज्यमन्त्री पदको शपथ गराएका थिए ।

राजेन्द्र महतो अनुपस्थित

उपप्रधान तथा शहरी विकास मन्त्री राजेन्द्र महतो शपथग्रहण कार्यक्रममा अनुपस्थित भएका छन् । समारोहमा जसपाका अध्यक्ष महन्थ ठाकुरलगायतका नेताहरुको उपस्थिति भएपनि मन्त्री महतो अनुपस्थित भएका हुन् ।

जसपाका नेता राजकिशोर यादव मन्त्री भएको असन्तुष्ट रहेका महतो शपथग्रहणमा अनुपस्थित भएको स्रोतको दाबी छ । उनले यादवलाई मन्त्री बनाउन नहुने माग राख्दै आएका थिए ।

अघिल्लो पटक भएको मन्त्रीपरिषद् विस्तारमा महतोका कारण यादवको शपथग्रहण रोकिएको थियो । तर, अध्यक्ष ठाकुरले प्रधानमन्त्री केपी शर्मा ओली र राष्ट्रपति विद्यादेवी भण्डारीसँग गहन छलफलपछि यादवलाई मन्त्री बनाइएको स्रोतको दाबी छ ।

 

प्रतिक्रिया दिनुहोस