काठमाण्डु – राष्ट्रिय स्वतन्त्र पार्टी (रास्वपा) सांसद मनिष झाले आईतबारको प्रतिनिधिसभा बैठकमा सभामुखले आफूहरूलाई बोल्न नदिएको आरोप लगाएका छन् ।

संसद् भवन नयाँ बानेश्वरमा सञ्चारकर्मीहरूसँग कुरा गर्दै झाले बिहान सभामुखसँग भएको छलफलमा पहिला आन्दोलनरत दल रास्वपालाई बोल्न दिने र अन्य प्रक्रिया अघि बढाउने सहमति भए पनि त्यस विपरीत सभामुखले आफूहरूलाई बोल्न नदिएको बताए ।

उनले भने, ‘बिहान सभामुखसँग भएको छलफलमा पहिला आन्दोलनरत दल रास्वपालाई बोल्न दिने भन्नुभएको थियो । तर बैठक सुरु भइसकेपछि रास्वपालाई पहिले बोल्न दिइएन, सभामुखले पनि झूटो बोल्नुभयो ।’

झाले सभामुखले सदनको अभिभावकत्व निर्वाह गर्न नसकेको र पेलेरै लाने व्यवहार देखाएको उल्लेख गरे । प्रमुख प्रतिपक्षी दलले सत्तापक्षसँग उधारो सहमति गरेकाले आफूहरूले आन्दोलनलाई निरन्तरता दिएको उनले बताए ।

उनले भने, ‘मानव तस्करी जुन भइरहेको छ, संगठित अपराध, त्यसमा गृह मन्त्रालयको केही जिम्मेवार कर्मचारी र गृहमन्त्रीको संलग्नताबारे हामीले आवाज उठाएर जुन बैठक अवरोध गर्ने र त्यसमा आवाज राख्ने र केही मागहरू हाम्रो छ स्पष्ट छ ५ बुँदे । प्रमुख प्रतिपक्ष दलले २ बुँदे सम्झौता गर्नुभयो तर हाम्रो यो उधारो सहमति भएन ।’

राष्ट्रिय प्रजातन्त्र पार्टी (राप्रपा) प्रमुख सचेतक ज्ञानेन्द्र शाहीले संसद् र सभामुख बिचौलियाको पक्षमा उभिएको आरोप लगाए । शाहीले भिजिट भिसा प्रकरणमा विपक्षी दलको विरोध हुँदाहुँदै पनि जबरजस्ती सदन चलाएर संसद् र सभामुख बिचौलियाको पक्षमा उभिएकाले आफूहरूले सदन बहिष्कार गरेको बताए ।

उनले भने, ‘संसद् र सभामुख बिचौलियाको पक्षमा उभिएको छ । हामीले संसद् बहिष्कार गरेका छौं, योभन्दा अरु विकल्प केही छैन । भिजिट भिसा प्रकरणमा विपक्षी दलको विरोध हुँदाहुँदै पनि जबरजस्ती सदन चलाएर संसद र सभामुख बिचौलियाको पक्षमा उभिएकाले आफूहरूले सदन बहिष्कार गरेको हौं । सांसदले उठाएका आवाजलाई सम्बोधन नगर्ने संसद्मा बस्नुको कुनै औचित्य हुँदैन ।’

शाहीले भिजिट भिसा प्रकरणमा माओवादी अध्यक्ष प्रचण्डले छेपारो प्रवृत्तिमा काम गरेको टिप्पणी पनि गरे ।