बाग्मती प्रदेशका मुख्यमन्त्री शालिकरामले पाए विश्वासको मत
काठमाण्डु – बाग्मती प्रदेशका मुख्यमन्त्री शालिकराम जम्कट्टेलले विश्वासको मत पाएका छन् ।
सोमबार बसेको प्रदेशसभा बैठकमा मुख्यमन्त्रीले विश्वासको मत प्राप्त गरेका हुन् ।
मत विभाजनका क्रममा उनको प्रस्तावको पक्षमा ५६ मत खसेको छ भने विपक्षमा ३७ मत खसेको छ । सभाका १५ जना सांसद तटस्थ रहेका थिए ।
११० सदस्यीय प्रदेश सभामा आज मतदानका क्रममा १०८ सांसद उपस्थित थिए । बहुमतका लागि ५६ जना सांसदको समर्थन चाहिनेमा मुख्यमन्त्री जम्कट्टेलले बहुमत समर्थन पाएका छन् ।
उनलाई नेकपा माओवादी केन्द्र, नेकपा एमाले, नेकपा एकीकृत समाजवादी र हाम्रो नेपाली पार्टी (हानेपा) ले विश्वासको मत दिएका छन् ।
२०७९ पुस २५ गते मुख्यमन्त्रीमा नियुक्त भएका माओवादी संसदीय दलका नेता जम्कट्टेलले यसअघि २०७९ माघ ३ गते पहिलोपटक र २०७९ चैत १० गते दोस्रोपटक विश्वासको मत पाएका थिए ।
