प्रहरी महानिरीक्षक खनालकाे निर्देशन ‘अपराधको वैज्ञानिक अनुसन्धान गर्नुस ‘
काठमाडौँ- नवनियुक्त प्रहरी महानिरीक्षक सर्वेन्द्र खनालले उपलब्ध स्रोतसाधनको उच्चतम प्रयोग गर्दै अपराधको वैज्ञानिक तथा परिमाणमुखी अनुसन्धान गर्न निर्देशन दिएका छन् ।
प्रहरी महानिरीक्षक खनालले पदबहालीपछि प्रहरी प्रधान कार्यालय मातहतका अधिकृत तथा जवानलाई सम्बोधन गर्दै आपराधिक क्रियाकलापमा संलग्नलाई कानून बमोजिम कारबाही गर्न कुनै कसर बाँकी नराख्न निर्देशन दिएका हुन् । समाजमा शान्ति सुरक्षा कायम गर्दै प्रहरी असहाय नागरिकको साथी बन्नुपर्ने उनकाे भनार्इ थियाे ।
संगठनको आन्तरिक सुदृढीकरण, संरचनागत सुधार, प्रहरी कर्मचारीको वृत्तिविकास तथा सेवासुविधा आफ्नो प्राथमिकताको विषय रहेको बताउँदै पेशागत आचरण विपरीत काम गर्ने एवं भ्रष्टाचारजन्य क्रियाकलापमा संलग्नलाई कारवाही गरिने स्पष्ट पारे । अग्रजका राम्रा कामको अनुसरण गर्दै संगठनको छवि अझ उच्च बनाई कर्मचारीबीच आत्मीयता तथा भाइचाराको विकास गरिने समेत उनले दावी गरे ।
