कर्णालीमा बजेटपछि नयाँ सरकार, मुख्यमन्त्रीमा यमलालको चर्चा
काठमाण्डु – नेकपा एमालेले कर्णाली प्रदेशमा नयाँ सरकार गठन प्रक्रिया अघि बढाएको छ । प्रदेशसभामा स्पष्ट बहुमत रहेको एमालेले मुख्यमन्त्री महेन्द्र बहादुर शाही नेतृत्वको सरकारलाई ढालेर नयाँ सरकार गठन गर्ने भएको हो ।
आजको बैठकमा नेपाल पक्षका चार जना सांसदलाई पनि बोलाइएको छ । तर, उनीहरुले प्रदेश सरकारले ल्याएका नीति तथा कार्यक्रम पारित नगरी बैठकमा नजाने निर्णय गरेका छन् ।
सरकार गठनबारे छलफल गर्न बोलाइएको एमाले कर्णाली प्रदेश संसदीय दलको बैठक अझै बस्न सकेको छैन् । नेपाल समूहका सांसदले उपस्थित नहुने बताएपछि बैठक बस्न नसकेको संसदीय दलका नेता यमलाल कँडेलले जानकारी दिए ।
सर्वोच्च अदालतले माधव नेपाल समूहका चार जना सांसदलाई पुर्नवहाली गरेपछि प्रदेशसभामा एमालेको एकल बहुमत देखिएको हो ।
सोमबार बसेको प्रदेशसभाको बैठकमा सभामुख राजबहादुर शाहीले सर्वोच्च अदालतले पुर्नवहाली गरेको पत्र पढेर सुनाएका थिए ।
एमालेका सांसद प्रकाश ज्वाला, अम्मरबहादुर थापा, कुर्मराज शाही र नन्दसिंह बुढा अदालतको आदेश अनुसार नेकपा एमाले प्रदेश संसदीय दलको सदस्यको हैसियतमा कायम रहने छन् ।
४० सदस्यीय प्रदेशसभामा नेकपा एमालेसँग सभामुखसहित २० जना सांसद रहेका छन् । यसैगरी, माओवादीका १२, कांग्रेसका ६ र राप्रपाका १ सांसद छन् । अहिले मुख्यमन्त्री शाहीलाई कांग्रेससहित १८ जना सांसदको मात्रै समर्थन रहेको छ ।
बजेटपछि नयाँ सरकार
मुख्यमन्त्री शाही नेतृत्वको सरकारले ल्याएको नीति तथा कार्यक्रम पारित नगरी नयाँ सरकार गठन प्रक्रिया सम्भव नहुने भएको छ । नेपाल समूहका सांसदहरुले सरकारले ल्याएको नीति तथा कार्यक्रम पारित हुने दाबी गर्दै आइरहेका छन् ।
नयाँ सरकार गठनका लागि एमाले निर्णायक भूमिकामा रहेको छ । बजेटको मुखमा सरकार फेरबदल गर्ने कुरा उचित नभएको नेपाल समूहका एक सांसदले बताए ।
‘सरकार बजेट ल्याउनुपर्ने चटारोमा छ । नीति तथा कार्यक्रम पारित भएपछि हामी दलको बैठकमा सहभागी हुन्छौं’, ती सांसदले भने ।
मुख्यमन्त्रीमा यमलालको चर्चा
मुख्यमन्त्री महेन्द्र बहादुर शाही अल्पमतमा परेपछि एमालेको नेतृत्वमा नयाँ सरकार गठन हुँदैछ । नेकपा एमालेले कर्णालीमा एकल रुपमा नयाँ सरकार गठन गर्ने तयारी सुरु गरेको हो ।
एमाले संसदीय दलका नेता तथा कर्णाली प्रदेशका इन्चार्ज यमलाल कँडेल मुख्यमन्त्री बन्ने सम्भावना रहेको स्रोतले जानकारी दियो । एमालेका एक जना सांसदकाअनुसार कँडेल संसदीय दलको नेता भएकाले पनि उनी नै मुख्यमन्त्री बन्ने सम्भावना रहेको छ ।
‘हामी हिजोबाट निरन्तर छलफलमा जुटेका छौं । आज पनि छलफल जारी छ । संसदीय दलको नेताको हैसियतले उहाँ (कँडेल) नै मुख्यमन्त्री बन्ने सम्भावना रहेको छ’, एमालेका एक प्रदेशसभा सदस्यले भने ।
