काठमाण्डु – सत्तारुढ दल नेपाल कम्युनिष्ट पार्टी (नेकपा) का अध्यक्ष केपी शर्मा अ‍ोली स्थायी कमिटी बैठक बोलाउन सहमत भएका छन् ।

बिहीबार प्रधानमन्त्रीको सरकारी निवास बालुवाटारमा अर्का अध्यक्ष पुष्पकमल दाहाल प्रचण्डसँगको भेटवार्तामा प्रधानमन्त्री ओली बैठक बोलाउन सहमत भएका हुन् ।

दुवै अध्यक्षबीच बैठकका एजेन्डाबारे छलफल हुने स्रोतको दाबी छ । दुवै अध्यक्षबीचको बैठक पुनः भोली बालुवाटारमा बस्ने भएको छ ।

‘आजको बैठकमा स्थायी कमिटी बैठक बोलाउन प्रधानमन्त्रीजी सहमत हुनु भएको छ’, स्रोतले भन्यो, ‘बैठकका नयाँ एजेण्डा तय गरेर बैठक बोलाउन दुवै अध्यक्ष सहमत हुनुहुन्छ । सम्भवत भोलीको बैठकले एजेण्डा तय गरेर बैठकको मिति टुंगो लगाउने छ ।’

यसअघिको भेटवार्तामा प्रधानमन्त्री ओलीले स्थायी कमिटी र केन्द्रीय कमिटी बैठक छलेर सचिवालय बैठक बोलाउने अडान लिँदै आएका थिए । उनले कोरोना भाइरसको संक्रमणका कारण ठूलो संख्यामा जम्मा हुन नहुने तर्क गर्दै आएका थिए ।

प्रधानमन्त्रीले यसअघि अबको पाँच दिनभित्र नेकपाको विवाद समाधान हुने दाबी गरेका थिए । उनले नेकपाभित्र विवाद नभएको पनि दाबी गरेका थिए । उनले पाँच वर्ष सरकार परिवर्तन नहुने सहमति अध्यक्ष प्रचण्डसँग गरेको बताए ।