काठमाण्डु – पाँच दलीय सत्ता गठबन्धनमा आवद्ध दल नेकपा माओवादी केन्द्रले प्रतिनिधिसभातर्फ आठ जना महिलालाई उम्मेदवार बनाएको छ ।

मंसिर ४ गते हुने प्रतिनिधिसभाको प्रत्यक्षतर्फ ४८ वटा निर्वाचन क्षेत्रमा आफ्ना उम्मेदवार उठाउँदा ८ जना महिलालाई समेटेको हो । तर, प्रदेश १, मधेस प्रदेश र गण्डकी प्रदेशमा भने माओवादीबाट महिलाहरूको उम्मेदवारी शून्य छ ।

बागमती प्रदेशमा माओवादीले पाँच जनालाई उम्मेदवार बनाएको छ । सबैभन्दा धेरै काठमाण्डुबाट ४ जना र ललितपुरबाट एक जना महिलाले माओवादीबाट उम्मेदवारी दर्ता गराएका छन् ।

माओवादी नेतृ ओनसरी घर्तीले गठबन्धनको साझा उम्मेदवारका रूपमा काठमाण्डुको क्षेत्र नम्बर २ बाट उम्मेदवारी दर्ता गराएकी छन् । त्यस्तै मानुषी यमी काठमाण्डुको क्षेत्र नम्बर ७ बाट उम्मेदवार बनेकी छन् ।

माओवादी पोलिटब्यूरो सदस्य कल्पना धमला काठमाण्डु ९ बाट, अञ्जना विशंखे काठमाण्डु १० र पम्फा भुसाल ललितपुर ३ बाट उम्मेदवार बनेकी छन् ।

त्यसैगरी पोलिटब्यूरो सदस्य रेखा शर्मा लुम्बिनी प्रदेशमा दाङ २ बाट माओवादीकी एक्ली उम्मेदवार बनेकी छन् । त्यस्तै सुदूरपश्चिम प्रदेशबाट पनि माओवादीले एकल महिला उम्मेदवार उठाएको छ ।

जसमा कञ्चनपुर १ बाट बिना मगरले उम्मेदवारी दर्ता गराएकी छन् । उनी माओवादी अध्यक्ष पुष्पकमल दाहाल प्रचण्डकी बुहारी पनि हुन् ।

प्रतिनिधि सभातर्फ एउटा मात्रै निर्वाचन क्षेत्र रहेको जुम्लामा माओवादीले केन्द्रीय सदस्य गोमा गौतमलाई उम्मेदवार बनाएको छ ।