काठमाण्डु– काठमाडौंमा जारी त्रिदेशीय महिला टी–२० क्रिकेट शृंखलाको चौथो खेलमा नेदरल्यान्ड्ससँग नेपाल पराजित भएको छ ।

कीर्तिपुरस्थित त्रिवि क्रिकेट मैदानमा टस जितेर पहिला ब्याटिङ गरेको डच टोलीले दिएको १४१ रनको लक्ष्य नेपालले भेटाउन सकेन ।

नेपालले ८ विकेट गुमाएर १२५ रन मात्रै बनाउन सक्यो । नेपालका लागि कप्तान इन्दु वर्माले ३०, सम्झना खड्काले २३, पुजा महतोले १८, कविता जोशीले १४ रनको योगदान दिए । अन्य खेलाडीले राम्रो रन ल्याउन सकेनन् ।

नेदरल्याण्ड्सका तीन खेलाडीले २, २ विकेट लिए ।

यसअघि पहिला बलिङ गरेको नेपालका लागि सिता राना मगरले ५ विकेट लिएकी थिइन ।

नेपालले शृंखलाको सुरुवाती दुवै खेल गुमाएको थियो । आज पनि पराजित भएपछि नेपालको उपाधि यात्रा कठिन बनेको छ । नेपालले बिहीबार नेदल्र्यान्ड्ससँगको पहिलो खेल र शनिबार थाइल्यान्डसँग पराजित भएको थियो ।

थाइल्यान्डले दुई र नेदरल्यान्ड्सले एक खेल जितेका छन् । हरेकले एकआपसविरुद्ध तीन खेल खेल्नेछन् । तीन देश सहभागी शृंखलाको शीर्ष स्थानमा रहने टोलीले उपाधि जित्नेछ ।