काठमाण्डु- नेकपा (एकीकृत समाजवादी) का सम्मानित नेता झलनाथ खनालले जारी केन्द्रीय कमिटी बैठकमा असन्तुष्टि व्यक्त गरेका छन् ।

अध्यक्ष माधवकुमार नेपालले पार्टी निकट विद्यार्थी संगठन अनेरास्ववियू र युवा संगठनमा मनपरी गरेको आरोप लगाउदै उक्त गलत निर्णय सच्याउन माग गरेका हुन् ।

पार्टी अध्यक्ष नेपालले जारी गरेको अपानिमा दोहोरो जिम्मेवारीको नाममा अनेरास्ववियूकी अध्यक्ष आरती लामा र युवा संघका अध्यक्ष कृष्ण विकलाई पदमुक्त गरेका थिए ।

त्यसपछि अनेरास्ववियूमा समानन्तर कमिटीको अभ्यास भइरहेको थियो । माधव नेपालको यस्तो कदमको विरोध गर्दै सम्मानित नेता खनालले पार्टी नेतृत्वले निरंकुश र नोकरशाही शैलीमा मनपरी ढङ्गले युवाहरुलाई हाक्न खोजेको आरोप लगाएका छन् ।

यस्तै खनालले आफूलाई ‘सामान्य सदस्य’ भन्दै फरक मत दर्ज गरेका छन् । पार्टीको विधानले सम्मानित र वरिष्ठ नेता केन्द्रीय कमिटीको बैठकले निर्वाचित गर्नुपर्ने व्यवस्था गरेपछि त्यसप्रति असन्तुष्टि राख्दै खनालले आफूलाई ‘सामान्य सदस्य’ भनेका हुन् ।

उनले १० औं महाधिवेशन गरेर पार्टीलाई ‘टीके प्रथा’ बाट जनवादी केन्द्रीयताका आधारमा निर्देशित कमिटीहरु बनाउन थालेको भन्दै असन्तुष्टि राखेका हुन् ।

बैठकअघि नै उक्त पार्टीले अपानि जारी गर्दै अनेरास्ववियूकी अध्यक्ष आरती लामा र युवा संघका अध्यक्ष कृष्ण विकलाई दोहोरो जिम्मेवारीका नाममा पदमुक्त गरेको थियो । त्यसपछि अनेरास्ववियूको लामा पक्षीय खेमाले समानान्तर केन्द्रीय कमिटी घोषणाका लागि गत साता एक कार्यक्रमको आयोजना गरेको थियो ।

खनालकै प्रमुख आतिथ्यतामा आयोजित उक्त कार्यक्रममा खनालले विवाद व्यवस्थापनका निम्ति फागुन १२ गतेसम्म केही नगर्न भनेपछि उक्त दिन कमिटी घोषणा भएन । अर्को भेला १२ गते आयोजना गर्ने गरी उनीहरुले तयारी गरिरहेका छन् ।

‘गलत निर्णयलाई सच्याऔं, पार्टीलाई एकताबद्ध बनाएर अघि बढौं’ शीर्षकमा खनालद्वारा बैठकमा वितरित फरक मतमा उनले लेखेका छन्, ‘यो अवस्थामा फेरि टिके प्रथा ठाडो बर्खास्तगी गर्ने, ठाडो नियुक्ति गर्ने, मन नपर्नेलाई हटाउने, मन परेकालाई ठाडो नियुक्ति गर्ने, छँदा खाँदाका कमिटीहरू विघठन गर्ने, उनीहरूका आफ्ना सम्मेलन र अधिवेशन गर्न नदिने, मनोमानी ढंगले नियुक्ति गर्ने, संगठनका साथीहरुमा विभाजन ल्याउने तरिका भनेको गुटबन्दीपूर्ण, विभाजनकारी र विघठनकारी तरिका हो । हाम्रो पार्टीले यस्ता तरिकाको दृढतापूर्वक विरोध र अस्वीकार गर्नुपर्छ । यो निरंकुश तरिका हो, यो नोकरशाही तरिका हो ।’

२० को दशकमा एउटा पार्टीको जस्तै विकासक्रममा आधारित अनेरास्वबियूको ३० को दशकमा पार्टी पुनर्गठन भएपछि पुनर्गठन भएको भन्दै उनले लेखेका छन्, ‘हामीले जनसंगठन बनायौं , पार्टी र जनसंगठनबीचको सम्बन्ध सञ्चालन गर्ने नीति बनायौँ, पार्टीको सामान्य कार्यदिशाअनुरूप अघि बढ्नुपर्ने उनीहरूको आफ्नै विधान, कार्ययोजना र दैनिक कार्य हुने भूमिगत कालमा नै स्थापित नीति हो । यद्यपि त्यतिबेला पार्टीमा जनवाद भन्दा केन्द्रीयता प्रधान थियो ।’

उनले २०४६ को परिवर्तनपछि पार्टी र जनसंगठन बीचको सम्बन्धमा परिवर्तन आएको उल्लेख गरेका छन् । ‘अब केन्द्रीयता होइन जनवाद प्रधान बन्ने अवस्था सिर्जना भयो’, उनले लेखेका छन् ।